Kommunen har kjøpt denne eigedomen på Halsnøy

I ei årrekkje har det vore snakk om at avkøyrsla frå Sæbøvikvegen og opp til Heiavegen på Halsnøy må utbetrast. No har Kvinnherad kommune kjøpt ein 1.227 kvadratmeter stor eigedom som ligg midt i krysset for over to millionar kroner.

– Det er ei stygg avkøyrsel kor det både er smalt og dårleg sikt. Dette er eit kryss som har vore påpeika i den gamle trafikktryggleiksplanen og som også er påpeika i den nye planen. Hovudgrunnen til at vi no har kjøpt denne eigedomen er at vi har tenkt å utbetra krysset, seier sektorleiar for teknikk og miljø Sigbjørn Øye i Kvinnherad kommune.

Strategisk plassering

Tomtegrensene på kommunen sin nye eigedom går ut både i fylkesvegen og den kommunale vegen opp mot Heiavegen. I tillegg så ligg den heilt inn mot Halsnøytunet.

– At den ligg mellom to offentlege vegar og Halsnøytunet gir oss mange moglegheiter, så det er eit strategisk oppkjøp for vår del, seier Øye.

Kommunen er i dag i grunnforhandlingar med dei som eig eigedomen på motsett side av den kommunale vegen, for å sjå kva som kan gjerast for å utbetra vegen i området.

– Vi ser for oss å gjera vegen breiare, laga fortau og få betre sikt i begge retningar i krysset. Vi er i grunnforhandlingar med dei som eig på motsett side av den kommunale vegen, og når vi no har kjøpt Heiavegen 86, så gir det oss gode moglegheiter for å få til eit bra vegprosjekt, seier Øye.

Vil leiga ut

Kva som skal skje med det kvite huset frå 1928 som prydar eigedomen, er endå ikkje heilt bestemt.

– Det er eit eldre hus, men det er i ganske god stand. Vi har kjøpt det, og kunne i praksis teke dei areala vi treng og så selt det etterpå, men det er heilt uaktuelt å gjera. Vi ser heller for oss at vi kan leiga det ut, seier Øye.

– Så det er ikkje planen å riva det?

– Vi har ingen planar om det no. Det kan skje på lang sikt, men vi ser som sagt for oss å leiga det ut, svarar sektorleiaren.