Svein Eikeland viser fram ei av dei digitale løysingane som er tatt i bruk ved Rosendalstunet, «Komp». Slike skjermar vart kjøpt inn under pandemien, då det var strenge restriksjonar for fysiske besøk ved sjukeheimane. Desse legg til rette for digital kommunikasjon mellom menneske, og er designa for å vera enkel i bruk.

Kommunen får 85.000 for å motverke digitalt utanforskap hjå eldre

E-helse Vestland har no fordelt tilskot som skal bidra til å motverke einsemd hjå eldre ved å auke den digitale kompetansen.

Jorun Larsen
Publisert Sist oppdatert

I 2021 vart E-helse Vestland innvilga 1.500.000 kroner frå Helsedirektoratet. Desse pengane skulle fordelast på dei 34 kommunane som er knytt til E-helse Vestland, og gå til tilskot for å auke digital kompetanse hos eldre. No er midlane fordelt.

Kvinnherad kommune søkte om 104.400 kroner, og har no fått tildelt 85.000 kroner. Prosjektet kommunen søkte om tilskot for er kalla «Fokus på institusjon. Gruppeundervisning. Kommunale verkty.» Prosjektet gjeld, i følgje prosjekttittelen, for eit halvt år.

Tilskot til alle som søkte

I tildelingsbrevet kjem det fram at 19 kommunar søkte tilskot, og alle kommunane som søkte har fått tildelt tilskot.

– Søknadane vi har fått inn har vore særs like i prosjektskildringa. Totalt har vi fordelt 966.000 kroner av totalsummen på 1.500.000 kroner, der resterande beløp vert brukt til å dekke inn administrering av prosjektet i regi av E-helse Vestland, skriv E-helse Vestland.

Denne tilskotspakken er ein av fleire aktivitetar som E-helse Vestland har starta opp. Føremåla er å «sikre at eldre i Vestland får nytte av tilgjengeleg teknologi som kan avhjelpe einsemd og isolasjon», samt å «sikre at eldre i Vestland får tilstrekkeleg kunnskap til å nytte seg av teknologien».

Tiltaka skal mellom anna skape møteplassar mellom unge og eldre, og auke kompetanse hjå personell, slik at dei kan forstå bruk av ulike kommunikasjonsverktøy.

vitskap og teknologi nyhende medisin og helse kvinnherad helsevesen teknologi
Powered by Labrador CMS