Kommuneleiinga: – Spelereglane er følgde

Kommunedirektør Ragnhild Bjerkvik er krystallklar på at spelereglane for arbeidslivet er følgde i saka om turnusane.

Før formannskapsmøtet sendte kommuneleiinga ut ein grundig analyse av saka.

«Turnusplanlegging er relativt komplisert for dei som ikkje er kjent med turnusarbeid, tariffavtale og regelverk knytt til dette. Det er difor eit mål med denne utgreiinga å ikkje gå for mykje i detaljar rundt sjølve turnusordninga, men å forklara hovudtrekka, slik at problemstillinga kan forståast sjølv om ein ikkje har detaljkunnskapar rundt turnusplanlegging», vart det forklart.

Deretter vart det understreka at det er to måtar å spara inn på drifta i pleie- og omsorgssektoren: Å redusera tenestetilbodet, eller å drifta tenestene på andre måtar.

«Kommunedirektør har ikkje fått signal om at tenestetilbodet skal reduserast, og det har difor vore naturleg å sjå på om - og korleis, tenestene kan driftast annleis enn i dag. Eitt av grepa for å gjere nettopp dette, er å tilpassa turnus etter dei vedtekne økonomiske rammene», heiter det.

Ansvaret

Vidare vert det understreka at politikarane (kommunestyret) sitt ansvar er knytt til vedtak av dei økonomiske rammene, medan kommunedirektør sitt ansvar er knytt til drift og iverksetjing av tiltak innafor desse rammene.

«Kommunelova § 13-1 7. ledd gjev såleis klare føringar på at det løpande personalansvaret er lagt til kommunedirektøren. Korleis kommunen skal utarbeida turnusavtaler fell klart inn under dette ansvaret», vart det opplyst.

Seinare i notatet vert det påpeika at turnusavtalar som berre krev drøfting blir gjeldande uavhengig av om tillitsvalde er samde i drøftinga eller ikkje.

«Ved usemje i drøftingspunkt vil arbeidsgjevar sitt standpunkt alltid vera gjeldande, med mindre det skulle strida mot lov eller tariff. Turnusavtalar som krev forhandlingar, må derimot partane bli samde om for at avtalen skal bli gjeldande», står det.

Har forståing

Til slutt står det at arbeidsgjevar har forståing for at Fagforbundet ikkje er nøgd med å ikkje bli høyrd i drøftinga om bruk av 28 eller 29 vakter.

«Men det er likevel arbeidsgjevar si oppfatning at arbeidslivet sine spelereglar då er at arbeidsgjevar sitt standpunkt vil vera gjeldande. Bruk av tal vaktar i ein turnus er ikkje regulert i arbeidsmiljølova eller tariffavtalar, og er difor ikkje eit forhandlingstema ved turnusplanlegging».