Kommunedirektøren informerte om kontraktstøyen

I formannskapsmøtet på torsdag nytta kommunedirektøren høvet til å orientera om dei pågåande tvistane kommunen har med leverandørar.

I kommunedirektøren si faste orientering til formannskapet, nytta ho blant anna høve til å informera om status i dei pågåande sakene med Hordaland Entreprenør og Norwegian Pipeline Drilling.

– Kvinnherad kommune har kontraktar med mange, og me har mange prosjekt gåande. Alle innkjøp over ein viss storleik må ut på anbod, jamfør lov om offentlege innkjøp, minna Ragnhild Bjerkvik formannskapsmedlemmene om, som eit grunnleggjande premiss for den vidare orienteringa.

 

Hordaland Entreprenør

– Anleggsvegen til Kvinnherad Arena er ein kontrakt på 16,6 millionar kroner med Hordaland Entreprenør. Det er utført endringsmeldingar, og dei er betalt, totalt kring 5,7 millionar kroner. Anlegget overtatt, og nye krav komne.  Det er stor avstand mellom partane, men det er dialog. Andre forhold med kontrakten tar me mellom partane, ikkje i media og opne møte. Skal me bli tatt som ein seriøs part, må det vera slik, meinte kommunedirektøren.

 

Svartavatnet

Kvinnherad kommune inngjekk i fjor kontrakt med Norwegian Pipeline Drilling om å bora nytt inntak i Svartavatnet til Husnes vassverk.

– Det er usemje her også. Me meiner kontrakten ikkje er utført. Dei har terminert kontrakten. Me har plikt om å opptre ryddig, og forvalta kontrakten på ein god måte. Me ivaretar midlar som er vedtatt, det er skatteinntekter, og det har me stor respekt for. Ikkje privatbedriftslege midlar dette, sa Bjerkvik om den tvisten.

Ho nytta også taletida si til fortelja at arbeidet med Kvinnherad Arena pågår.

– Me har planlagt sak til kommunestyremøtet i april. Det er restfinansiering som skal på plass, og me treng litt tid. Me har god margin til vedståingsfristen til Leigland Bygg, understreka ho.