Kome ynske om 600 gåver

Til Frivilligsentralen sin pakkeaksjon har det kome inn gåveynske enten via dei kommunale tenestene eller direkte frå private. Ynska frå barn og unge blir hengt opp i juletre, som er plasserte på Husnes storsenter, senteret på Sæbøvik, Varehuset Rosendal og i kantina på rådhuset. Folk kan plukka med seg ein lapp og gå og handla det som står der. Gåva skal så leverast til Frivilligsentralen, og dei syter for at den blir formidla vidare til den som kom med ynsket. På trea heng ein plakat med overskrifta «Oppfyll eit ynske – Eit juletre med meining».

Endane til å møtast

I Kommunestyret på torsdag vart det opplyst at det har kome inn nærare 600 gåveynske.

– Fleire og fleire tek direkte kontakt og fortel at dei slit med å få endane til å møtast. Det er ei dyrtid i landet og i Kvinnherad, og det må vi ha med oss, sa ordførar Vegard Bjørnevik (H), og oppmoda dei av politikarane som har høve til det til å kjøpa ei gåve.

– Dette er eit veldig flott tiltak, som vi håpar kan bidra til det betre, la han til.

Veronica Thorkildsen Thorsen (Sp), dagleg leiar i Kvinnherad Frivilligsentral, takka for oppmodinga frå ordføraren.

– Per no har vi pakka om lag 350 gåver, så vi manglar 250, opplyste ho.