Kom seg på fote i Uskedalen

I eit lite bygg ved sida av salongen ventar fotpleiar Ann Kristin Olsen på si fyrste prøvekanin i det nye lokalet, kollega og Zjakk-frisør Ann-Christin Huke. Olsen er derimot langt i frå ny i faget.

– Eg tok fotpleiarutdanning i 2007 og har jobba med dette sidan då. Dei siste åra har eg vore på Husnes, men då det vart klart at ho som eig salongen der skal pensjonera seg og leggje ned, så byrja eg å sjå meg rundt etter andre mogelegheiter, fortel Olsen.

Sommarfuglar i magen

Prøvekanina Huke har sett seg godt til rette i stolen og fått føtene plassert i eit dampande varmt vassbad.

– Eg tåler litt varme, dette var deileg, seier Huke smilande.

Medan Olsen fartar litt hit og dit for å gjera alt klart og finna det ho treng, fortel Huke frå stolen korleis det heile kom i stand.

– Me har snakka masse om at det burde vore meir av slike tilbod, og når me då fekk veta at salongen på Husnes forsvinn byrja me å sysla med tanken for alvor. Me skulle gjerne ha hatt det inne i sjølve salongen, men det er det rett og slett ikkje plass til, seier ho.

– Sidan det er same eigar på begge desse bygga her, så fekk me leiga dette rommet også. Og kanskje er det litt greitt også med ei eiga avdeling, fortset Huke.

Fyrste offisielle opningsdag er fyrstkomande fredag 01. september, og Olsen innrømmer at ho har store sommarfuglar i magen.

– Eg er veldig spent på korleis det kjem til å bli. Eg kjenner på ein del sommarfuglar for det eg mister med jobben på Husnes, men også for å bli kjent med så mange nye her, fortel Olsen.

– Eg har derimot med meg ein del gamle kundar frå salongen på Husnes, fleire gav beskjed om at dei ville fylgja meg dit eg hamna. Så det er jo veldig kjekt, og mykje av grunnen til at eg ynskjer å fortsetja, legg ho til.

Fullbooka

Olsen understrekar derimot at ho er fotpleiar og ikkje fotterapeut.

– Det er to ulike ting. Eg kan bruke skalpell på det eg er komfortabel med, men kirurgiske ting gjer eg ikkje, forklarer ho.

Både Huke og Olsen er spente på den komande tida, men har likevel eit stort håp om suksess for den nyetablerte bedrifta.

– Eg har fulle lister og er allereie fullbooka heile fredag, men det er absolutt mogeleg å få time framover likevel, lovar den smilande fotpleiaren.

– Merker de eit reelt behov for eit slikt tilbod her?

– Absolutt! Mange me har snakka med er veldig glade for at me startar opp, fortel Huke.

Prøvekanina i stolen er i alle fall nøgd med behandlinga ho får.

– Dette er jo berre så deilig, ein føler det som om ein går på luftputer etterpå, konkluderer Huke smilande.