Kom deg ut-dagen 2024

Det skulle vore ein vinterdag i snøen, men vêret – som ingen rår over – ville det annleis. Dermed blei Tveitedalen bytta ut med Husnes og turstripa langs Opsangervatnet då Kvinnherad Turlag inviterte til årets Kom deg ut-dag.

Eit hundretals store og små nytta seg av tilbodet Jarle Røstbø, Monica Sletten, Mona Røstbø, Ann Kathrin Røssland og Gunn Heidi Eikemo Steine stelte i stand.

Ideell plass

Blide fjes hos arrangøren vart spegla i ditto blide fjes hos dei som vitja turlagstiltaket søndag.

– Når alt kjem til alt, så er dette kanskje ei ideell plassering av dagen. Omgjevnadane er trygge og flotte, me er i livd for vinden og stemninga er god, vurderte leiar i Kvinnherad Turlag Jarle Røstbø.

– Kor viktige er slike dagar som dette for turlaget?

– Det er god reklame for vår aktivitet. Me har ein slik dag om vinteren og ein om sommaren. Vinterstid er me vanlegvis i fjellet med snø, men me treff nok eit anna publikum her enn me ville gjort til fjells, eller i Tveitdalen i dag. Dei som kjem dit i slik vêr som no, er kanskje ute i naturen oftare enn dei fleste. Derfor har det ein verdi at me er her i dag. Det er så lågterskel som du får det, seier Røstbø om arrangement mellom Opsangervatnet og Opsangervegen.

Røstbø gir damene han har med seg æra for at det i det heile blei ein slik dag der det blei.

– Alternativet ville vore å avlysa, og det er ikkje noko kjekt det heller. Det er litt arbeid knytt til å skipa til dette, men det er viktig for oss å treffa både unge og eldre, sjølv om dette er ein dag primært med fokus på barna, seier Røstbø vidare.

Aktivitetar

Ein liten kombinert natursti og quiz var laga til langs stien, og dei som labba langt nok møtte turlagsreven Turbo, som alltid syt for lun og god stemning der han/ho er. I tillegg til arket med spørsmål var det eit knippe andre aktivitetar å leika seg med, eller rettare; bryna seg på.

Balansering på line og tårnbygging med klossar var to av dei. Ringkast på hjortegevir eit trede, og det nytta Pernille (8) og Emil (6) Markhus sjansen til å prøva ut. Dei var med mamma Tanja og pappa Øystein rundt i løypa.

– Eg er mest heilt ferdig med quizen, men det er eit par ting me ikkje finn, seier Emil til Grenda og viser arket som mellom anna ber dei sjå etter måne, stjerne og gul snø. Ingen av delane var å få auga på langs Opsangervatnet midt på søndagen.

Men dei fann Mona Røstbø, og fekk gitt frå seg svararket sitt til ho.

– Me har levert ut kring 60 ark, og har hatt over hundre besøkande til no, sa ho i mellom utdelinga av grillpinnar til dei som var ferdige med runden.

Om det var dei grillpinnane eller dei grilla pølsene som var mest populære å ta med seg, skal vera usagt. Begge deler fekk bein å gå på, og var prov på at Kom deg ut-dagen framleis er eit populært arrangement.