KNS Ung – ein sosial og kreativ arena for dei under 40
Kvinnherad Næringsservice lanserer eit nytt forum for unge vaksne. Sjølv om initiativet kjem frå KNS, understrekar dei involverte at det handlar like mykje om å utvikla kjekke fritidsaktivitetar som næringsliv.
– Eg starta i denne jobben i mai, og dette er ein av dei tinga eg visste at eg ville ta tak i, seier Bente Marie Sjo, dagleg leiar i Kvinnherad Næringsservice.
Sjo vil laga ein arena for unge vaksne, sidan ho har sakna å sjå folk i denne aldersgruppa i næringslivet i Kvinnherad. Ho har teke kontakt med Hege Digranes Lilleaas i HMR Husnes for å dra dette i gong.
Annonse
– Eg ser det er eit behov for at unge kan samlast og utveksla idéar utan store forpliktingar. Hege er ei dame som får ting gjort, difor kontakta eg ho, forklarar Sjo.
Ope for alle
I tillegg vart KNS-leiaren tilrådd å ha med Benjamin Hus Ripel frå Hydro Husnes. Lilleaas og Ripel skal no ta idéen vidare, og dei håpar å få med seg mange fleire. Første samlinga er 28. november i lokala til KNS, og initiativtakarane understrekar at alle unge vaksne er velkomne.
– Dette er for alle! Både folk i bedrifter, i kommunale jobbar, i permisjon, i studie, uføre – me vil snakka med alle unge vaksne for å finna ut kva som trengs i kommunen vår for å få folk til å villa bu her, seier Hege Digranes Lilleaas.
Annonse
Dette skal altså både vera ein arena for idéutvikling som kan fremja det framtidige næringslivet i Kvinnherad, men også skapa ein kultur for gode fritidsaktivitetar og sosiale nettverk for unge vaksne, i følgje Bente Marie Sjo.
– Eg høyrer at til dømes Hydro slit med å få lærlingane til å bli i kommunen etter endt læretid fordi dei kjedar seg her, og vil flytta. Det må me gjera noko med!, slår ho fast.
Ripel og Lilleaas vil at det skal vera ein uformell struktur på KNS Ung.
– Det skal ikkje vera noko medlemsskap eller bindingstid. Me vil det skal bli eit forum som kan tenkja litt nytt i høve kva fritidstilbod me saknar her, og prøva å byggja opp det. Det må vera lystbetont, seier Hege Digranes Lilleaas.
– Eg trur det er lettare å få til eit godt miljø dersom folk frå fleire arbeidsplassar gjer noko sosialt saman. Kanskje ein felles fredagspils, i staden for at alle har kvar sin, føreslår Benjamin Hus Ripel.
Vil fremja lokal næring
Annonse
I tillegg til å betra det sosiale livet for unge Kvinnheringar, har gjengen også ambisjonar om at dette skal ha positive ringverknader for næringslivet og kommunen generelt. Dei meiner det er på tide at lokale bedrifter samarbeider meir, og vil skapa ein kultur for at yngre arbeidstakarar kan finna saman på tvers av bedriftene og utveksla erfaringar og behov.
– Me kan til dømes få til kursing og kompetanseheving for fleire bedrifter her lokalt, istadenfor at ei bedrift reiser til Oslo og ei anna reiser til Trondheim på kurs, meiner Ripel.
Bente Marie Sjo håpar at både arbeidsgjevarar og kommunen er positive til initiativet. KNS Ung skal presenterast på Kvinnheradkonferansen, og Sjo ynskjer at bedriftene tek med unge tilsette på konferansen. Ho rosar Hydro og HMR Husnes for å lata Lilleaas og Ripel få bruka litt av arbeidstida si på å utvikla konseptet vidare.
Siktar mot eit framtidig Kvinnherad
– Eg håpar kommunen også er positive til forslag og idéar som kjem ut av KNS Ung, imøtekoma dei, og vera med på utviklinga. Det har ein tendens til å koma gode idéar når folk samlast. Når dei gode idéane kjem, håpar me dei vert godt mottekne, seier ho.
No håpar gjengen at folk torer å koma til den første samlinga.
Annonse
– Det er utruleg låg terskel, og me håpar det kjem mange, sjølv om dei kanskje ikkje trur dette er noko for dei. Ein kan koma aleine, eller ta med ein ven, me er opne for alle, insisterar Hege Digranes Lilleaas.
– Tenk om me kan snu oss om fem år og sjå at me fekk til noko flott her. Tenk om det blir starta ei ny bedrift fordi nokon treftest i KNS Ung. Eg har så lyst til at dette bidreg til at dei yngre generasjonane har lyst til å bli verande her, eller koma tilbake hit etter endt utdanning, seier Sjo.
