Knapp auke i nybilsalet - spesielt eitt merke skil seg ut

På landsbasis blei det kjøpt 128.691 nye personbilar i 2024, 1,4 prosent fleire enn året før. Av alle desse bilane var 114.400 elbilar, noko som utgjer om lag 90 prosent. På verdsbasis er det ingen andre land som er nær ein like høg elbildel som Norge.

I Vestland var 91,2 prosent av selte bilar heilelektriske, noko som gjer fylket til det leiande på elbilkjøp.

10 prosent igjen

Ser ein nærare på dei 12 månadane i 2024, var det september som blei rekordmånaden, der heile 96,4 prosent av dei selde nybilane i landet var elektriske.

I Nasjonal transportplan (NTP) for 2018-2029 presenterte regjeringa Solberg at nye personbilar og lette varebilar skal vera nullutsleppskøyretøy (elbilar og hydrogenbilar) frå 2025. Øyvind Solberg Thorsen, direktør i Opplysningsrådet for veitrafikken (OFV), uttrykjer i ei pressemelding at dei siste prosentane for å nå målet, kan bli tunge å dra i land.

– Det gir klar beskjed til regjeringa om at det er heilt avgjerande å oppretthalda insentiv som gir fordelar ved kjøp av elbilar, dersom regjering og storting skal nå målet dei sjølve har sett, meiner han.

Utsett bilkjøp

Han legg til at sjølv om det var meir fart i nybilsalet i andre halvår, prega økonomiske utfordringar heile 2024. Han trur at mange utsette eller droppa bilkjøp, truleg i påvente av rentenedsettingar og auka kjøpekraft.

– Vi ser no inn mot ei økonomisk lysning, og mange nye og spennande bilmerke og modellar er på veg til Norge i 2025. Dersom elbil-intensiva blir oppretthaldne, kan nybilsalet få skote fart og bidra til at vi når 2025-målet. Tendensen dei siste par åra har vore at vi no kjøper mindre og rimelegare nye bilar, enn då rente- og prisnivå var langt lågare, og mykje kan tyda på at dét òg vil prega nybilsalet i året som kjem, legg direktøren til i pressemeldinga.

Tesla på topp

OFV-direktøren meiner også at trass fleire nye merker og modellar, vel dei fleste bilmerke dei har eit forhold til frå før. For på registreringsstatistikken i 2024 kan ein nemleg sjå at Tesla fekk ein suveren førsteplass med ein marknadsandel på heile 18,9 prosent. Det blei selt 16.858 nye Model Y og 7.264 av Model 3.

Vidare på lista finn ein Volswagen, Toyota, Volvo og BMW.

Fleire beheld den gamle

Året i fjor enda med at litt meir enn ein halv million personbilar skifta eigar. Det er 1,4 prosent færre enn 2023. Bruktmarknad er på alle måtar Norge sin største bilbutikk, kan ein lesa.

– Det har vore jamn og god fart i bruktmarknaden over tid. At talet har gått litt ned, saman med eit lågare nybilsal dei siste to åra, viser at mange har valt å behalda bilen dei allereie har, i staden for å kjøpa ny, uttalar Solberg Thorsen.

Også i bruktmarknaden blir det stadig fleire elbilar, og i 2024 var 21,5 prosent av alle eigarskifte elbilar – ein auke på 11,6 prosent sett opp mot 2023.

– Til saman i 2024 blei drygt 6.000 personbilar bruktimporterte til Norge, mot litt over 4.000 i 2023. Av desse var 63 prosent elbilar, sluttar han.