Kloster Laks ut i verda

– Det var magasinet som tok kontakt med oss, for dei skulle lage eit temanummer med Taste of Norway. Korleis dei hadde funne oss, det anar eg ikkje, men det var jo likevel utruleg kjekt, seier Rune Eide, som gjorde verksemd utav lakserøykinga i 2020.

Røykelaksen kjem i ulike smakar, anten med smak av Bareksten gin, chilli, einebær eller naturell. Også aure blir røykt og sendt ut til forhandlar. Mellom anna har Elins Matgleder aure frå Kloster Laks på menyen. Råvarene er kortreiste, då dei kjem frå Sekkingstad på Sotra.

20.000 eksemplar

I Scan Magazine - eit London-basert magasin som skal fremja merkevara Skandinavia - blir produkta til Kloster Laks omtala som «nær kongelege». Og i eit flott to-siders oppslag blir den lokale verksemda, produkta og Kvinnherad presentert.

Og det er dermed mange menneske som vil kunne få kjennskap til dette sanselege kinderegget. Heile 20.000 eksemplar av det engelskspråklege magasinet er nemleg nyleg distribuert rundt til ulike flyselskap og på nordiske flyplassar.

– I går fekk eg e-post om at dei hadde sendt eit eksemplar til meg, så eg får snart sjå det eg òg, fortel Eide til Grenda.

I magasinet kan lesarane mellom anna sjå at Kloster Laks har Kongeskipet på kundelista. Fine hotell og restaurantar, der i blant Michelin-restauranten Bare, like eins. Og kundelista er stadig i vekst.

Forrykande start for lokal røykelaks

Kapasitet på eitt tonn

Eide er til vanleg maskinist i Nordsjøen. Det er i fri-periodane han produserer røykelaks. Før påske vart det investert i eit nytt eldhus, der det akkurat går å lage eitt tonn, iallfall når naboen hjelper litt til.

– Når eg byrja var det 150 kilo til jul. No produserer eg eitt tonn, utan at det treng vera høgtid. Eitt tonn er litt mykje, for eg gjer jo alt sjølv og alt blir gjort for hand, krydring og marinering, tørking og røyking. Eg må jo halda tidene, så det blir jobbing til alle tider i døgnet. Men det går med litt hjelp, fortel han.

Sjølv om kvantumet er monaleg auka sidan starten i slutten av 2020 har han enno ikkje hatt problem med å få selt ut produkta. Enkelte kundar kjøper sider med røykelaks som enno ikkje er ferdig tørka, berre for å sikre seg til hendingar som påske, konfirmasjon eller 17. mai.

Ynskjer å halda det eksklusivt

Blir den framtidige etterspurnaden for stor er det truleg den kommersielle marknaden som må ta støyten.

– Eg har eit lite mål om å halda det eksklusivt, seier lokalmatprodusenten.

Eventyret byrja med at Eide produserte opp ein liten jule-batch til lokalsamfunnet i desember 2020. Det smakfulle produktet gjorde at kundegruppa raskt vaks seg større, og ambisjonane for å auke nedslagsfeltet ytterlegare er også til stades.

«Med tida håpar Eide å kunne eksportere Kloster Laks til restaurantar i Europa og andre stader, men han understrekar at røykelaksen han lagar berre vil bli funne i restaurantar kor den høge kvaliteten vil bli tilstrekkeleg verdsett», heiter det i magasinet.

Held etterspurnaden fram, vil det bli naudsynt å tilsetja folk. Eide er ikkje heilt framand for tanken, men førebels har han ikkje tatt ut ei krone frå verksemda grunna investeringar og lån. Eide håpar lønsemda i Kloster Laks vil sjå litt annleis ut i løpet av det neste året.

Heile familien involvert

Bileta som prydar reportasjen om det lokale firmaet er teke ved Halsnøy kloster, av fotograf Jan Ragnar Reigstad, som også kjem frå Halsnøy.

– Tanken var å gjera det litt i tråd med profilen vår. Så ungane som står bak i fotografiet er borna våre Ella og Lucas. Det er dei som sit på brygga i logoen vår òg. Og så er me veldig glade for at me fekk låna kruna frå Rosendalstunet. Den er jo frå 1886, om eg ikkje hugsar feil. Heile biletet blir liksom meir historisk då, fortel Eide.

Den bunadskledde kvinna, på biletet som no er masse-distribuert til reiseglade menneske i heile Norden, er Madeleine Eilerås Aasen, sambuaren til Rune.

Dei er nøgde med resultatet, og sjølv vêrgudane gjorde sitt til at resultatet vart så bra.

– Skyene den dagen vart jo veldig stilige, så det var jo litt flaks. Me er nøgde med bileta, slår han fast.

Frå Miami Beach til hageselskap

Produksjons-intervallane passar godt inn med jobben i Nordsjøen.

– Det blir om lag laga nytt kvar 6. veke, seier Eide, og legg til at dei siste gongane har han seld mykje av fisken før den er ferdig røykt.

Kloster Laks er blitt ei merkevare som det er stor etterspurnad etter, og i tillegg til produksjon driv han også med marknadsføring i fri-periodane, sjølv om dette i hovudsak er sambuaren sitt ansvarsområde.

At folk har lagt sin elsk på produkta deira ser heller ikkje ut til å slå negativt ut.

– Kygo tok faktisk med laksen vår til ein av dei eksklusive sjømatrestaurantane på Miami Beach, Joe’s Stone Crab. Der fekk kokkane smake, og dei tykte det var veldig god. Det er kjekt å høyre korleis produkta våre blir motteke i andre delar av verda, fortel Eide audmjukt, før han legg til.

– Til helga skal eg faktisk servere laks i eit hageselskap hos Kygo, så det er litt forskjellige saker me er med på. Me stiller opp på ulike arrangement etter forespørsel.