Klekte kyllingar i klasserommet

Før påske har 4. klassen ved Uskedalen skule meir enn dobla seg. Bakarst i klasserommet trippar nemleg 20 nyklekte kyllingar under det raude ljoset frå varmelampa.

– Vi har ein kylling kvar, for vi er 18 i klassen, fortel Dagny Kroka Raudstein.

Klassen har hatt dette som naturfagprosjekt i vinter. Lærar Trine Nødland kjøpte 24 turkisblå egg på internett, alle med termin før påske. Etter ei veke lyste elevane inn i egga for å sjå at det var liv.

Dei aller fleste egga vart klekte på fredag, og dei små fuglane har budd på skulen i helga.

– No byrjar dei å få venger. Til påske tek eg dei med heim, men eg må nok ta dei med tilbake til skulen ein gong for at elevane skal få sjå kor fort dei veks, seier ho.

Elevane hadde merka alle egga med kvar sine namn, og på fredag fekk Dagny sjå sin eigen kylling koma ut av skalet.

– Dei fleste hadde kome ut før vi kom på skulen, fortel ho.

Anders Flygandsver Feet, Elena Oline Jensen Eide og Siena Bu synest det er frykteleg koseleg med kyllingar i klasserommet. Dei plukkar opp tre små nøste, og set seg i sofaen bak i klasserommet for å leika med dei. Alle vågar å ta i kyllingane, sjølv om nokre av elevane synest det er litt ekkelt. Men det er lett å sjå at Siena er roleg og flink med fjørkreet.

– Eg er vane med fuglar, for eg har både vaktlar, duer og perlehøns heime. Og så har eg hatt kalkunar og geiter òg, fortel ho.

 

Det er ikkje første gongen lærar Trine tek med seg rugemaskin og klekkjer egg i eit klasserom. Det har ho gjort over alt der ho har jobba, både på Skarveland, Sunde og Mauranger skule, og i barnehagen og på skulen i Omvikdalen.

– Eg synest det er veldig kjekt, og trur borna har godt av å sjå korleis det fungerer i naturen, seier ho.