Klart for sommarutstilling på Flyt

Nokre dagar før opning vitjar Grenda lokalet, Baron Studio. Eit herleg virvar av fargerike og fantasifulle figurar står tolmodige langs veggane, og ventar på å finna sin mellombelse plass i denne verda. Det aller meste i utstillinga vil vera for sal, og det vert dessutan påfyll av nye figurar, teikningar og måleri gjennom sommaren. Utstillinga vil dermed vera levande, noko som medfører at det vert mogleg å oppdaga nye vesen for dei som ynskjer å besøka utstillinga fleire gongar.

– Det er veldig kjekt når ungar kjem på utstillingane mine, og sjølv om ein kanskje ikkje skal oppmoda folk til å ta på ting, legg eg til rette for at publikum skal kunne kjenne på fleire av figurane som blir utstilt her, seier Attramadal medan fingrane hans glir over ein av skulpturane som er nærast.

Arne Martin Guddal Husby, som driv Flyt aktivitetshus saman med familien, plukkar opp ei lita ugle frå ein kasse på golvet.

– Når ein tar på tingene kan ein jo dessutan kjenne kunstnaren si hand, legg han til.

Det taktile ved utstillinga adderer til det visuelle, og nyfikne barnehender vil såleis ikkje bli slått ned på, men derimot oppmoda til i denne utstillinga. Handspriten vil vera lett tilgjengeleg, og vonleg vert den medvite brukt av sommargjestene.

Humor og alvor

Det meste av utstillinga byr på heilt nye arbeid innan keramikk, måling og teikning. Sjølv om hovuddelen er prega av humor og fantasi, vil det også finnast meir alvorsame arbeid i (og utanføre) lokalet.

- Det er kjekt å ta med begge deler i utstillinga, for ved å sette alvor og humor opp mot ein annan blir det på ein måte meir ekte, seier Espen før han viser til ein av dei meir anatomisk korrekte og alvorlege skulpturane som skal stillast ut.

Skulpturen framstiller ein eldre mann som står støtt og roleg på sin sokkel. Med bar overkropp, barre bein og attlatne auge held han hovudet svakt heva. Det er mogleg eit sjølvportrett forklarar kunstnaren, både på grunn av sine veksande viker - skulpturen er skalla – men også fordi figuren representerer den roen som Espen sjølv ynskjer å få ein gong.

– Utstillinga speglar kanskje betre heile mennesket når ein kombinerer ulike stemningar slik, supplerer Arne Martin.

Nye fiskepinnar, eller fiskar på pinne

For dei som kjenner til keramikaren sitt kunstnarskap, kan det mogleg gle fleire at det har kome nye tilskot til fiskeserien. Her kan mellom anna Emo-Nemo, Hajal og Stein Berg Knausgård nemnast. Anatomien til desse fortryllande skapningane er like mykje inspirert av keramikaren sine born sine idear og teikningar, som av studiar av fiskeanatomi, og vert i all hovudsak skapt ut frå hukommelse og innfall. Metoden er særs kledeleg, og vil truleg kunne bidra til eventyrlege fabuleringar av både unge og vaksne som tek turen innom utstillinga i sommar.

På opningsdagen blir det, om alt går etter planen, mogleg å skape sine eigne figurar av leire på ein pop-up uteverkstad. Det vert ikkje rettleiing eller kurs, men inspirasjon til å laga sin eigen fantasifigur skal ein kunne få i rikt monn i utstillinga. Butikken Rein vil vera open samstundes som utstillinga, og det vert såleis mogleg å slå fleire fluger i same smekk denne dagen. Utstillingsopninga er sett til klokka 13.00.