Klart for ny påske på Kjeldestøl

Tradisjonen tru blir det open støl på Kjeldestøl på langfredag, altså fredag 29. mars.

– Sidan i fjor har det blitt utført mykje tømmerhogst i området, mellom anna langs nedre del av stien til Kjeldestøl. Noko av traseen vart litt skadd, men dette er no fiksa på, slik at det er like lett som tidlegare å føta seg, skriv Kjeldestøl Venelag i ei pressemelding i samband med at die skipar til open støl igjen.

2017 var fyrste året det vart arrangert open støl på langfredag. Over 300 tok turen til Kjeldestøl den gongen. Suksessen vart gjenteken dei to neste åra, med ny rekordnotering i 2019. Då reknar ein med det var kring 450 som gjekk til støls.

– Både i 2020 og 2021 måtte samlinga på langfredag avlysast, men dei opne stølane om sommaren vart gjennomført som normalt begge åra. No har me hatt to påskearrangement etter pandemien, og dei har vore like populære som før. I fjor snakka me til dømes om 350 besøkande, og både rømmegrauten og mjelkekakene vart utselde, skriv venelaget i meldinga.

Hyggelege folk

– Budeiene er sjølvsagt klare, og som alltid ivrige etter å koma i gang med sesongen. Vi satsar på at vêret slår til, og at mange finn vegen til støls. Ved å gå til Kjeldestøl på langfredag får ein både god trening og møta mange hyggelege folk, skriv Kjeldestøl venelag i meldinga.

Kjeldestøl ligg i Skaaladalen ved Rosendal, om lag halvannan time å gå frå kyrkja.

– Dersom nokon har behov for å køyra innover, kan dei gje beskjed til Kjeldestøl venelag på førehand, sluttar dei i pressemeldinga.