Klart for nok ein båtbyggjedag i Ølve
Pandemien har sett ein stoppar for båtbyggjedagen i Ølve to år på rad. Førstkomande søndag kan kulturnemnda i Ølve bygdelag endeleg invitera til da capo.
Publisert
Sist oppdatert
Programmet er klart, og dei som tek turen kan gle seg til utstillingar, kafe, musikk og aktivitetar både på land og til sjøs.
Mellom anna kjem hardangerjakta Mathilde heim til byggjeplassen, og ho er lova følgje av fleire andre gamle båtar, informerer bygdelaget i ei pressemelding.
Annonse
Kulturprogram
Tradisjon tru er det lagt opp til eit kunnskapsløft for dei som vitjar Bergeøyra på Nerhus i Ølve. Årets føredrag er ved Jørn Øyrehagen Sunde, som skal snakka om bygdeliv i baronitida.
Dernest blir det konsert med Fotefar, ein duo som består av to tidlegare Vinskvetten-medlemar, Kjell Østerbø og Bjørn Ivar Rusten.
«Som vanleg blir det båtbygging for borna og opne utstillingar både på Tollevsverftet og Haktorsverftet. Kafeen sel lapskaus, vafler og pølser», skriv kulturnemna i Ølve bygdelag vidare, før dei legg til at det blir parkering ved kyrkja denne dagen.
