Klart for Amandautdeling
Som Grenda tidlegare har skrive er den lokale filmskaparen Merethe Offerdal Tveit nominert til Amandapris i kategorien beste dokumentar. Den gjeve prisen skal delast ut i morgon, laurdag.
Publisert
Sist oppdatert
Det er med filmen «Odelsgut og fantefølgje» Merethe er nominert. Denne er hennar første langdokumentar, og har sidan den vart gitt ut i 2020 hausta fleire prisar. Filmen er produsert av Kristine Ann Skaret, og det er Lars Erlend Tubaas Øymo som er fotograf.
Merethe vil sjølv ikkje delta på utdelinga i Haugesund, då ho har ein annan prioritering denne helga som er vel så gjev: ho er nemleg nyleg blitt mor til ei lita jente. Filmskaparen vil difor følgja med på NRK si sending av seremonien.
Annonse
Beste norske dokumentar
«ODELSGUT OG FANTEFØLGE er ein tankevekkjande og underhaldande dokumentar som spør kva kunst er, kva som er kunsten si rolle i samfunnet og kven som har makta til å definere den.» Dette skreiv Bergen Internasjonale Filmfestival (BIFF) i omtalen sin av filmen då den vart vist under festivalen i 2020. På same festival vart filmen tildelt sin første pris, og vart allereie då trekt fram som Beste norske dokumentarfilm.
I Den norske filmfestivalen i Haugesund kjempar dokumentarfilmen mot «Generasjon Utøya» (regi: Aslaug Holm og Sigve Endresen, produsent: Tore Buvarp) og «Kunstneren og tyven» (regi: Benjamin Ree, produsent: Ingvil Giske). Det er desse tre som er henta fram av årets jury som dei beste norske dokumentarfilmane, noko som i seg sjølv er ein prestasjon.
Dei 23 filmane som i år er nominert til Amanda har alle hatt premiere på norske kinoar i perioden mellom 1. juli 2020 og 30. juni 2021. Den norske filmfestivalen i Haugesund finn stad frå 21. – 27- august, og startar såleis med Amandautdelinga. Prisshowet vert direktesendt på NRK.
