Klargjer massevaksinasjon i Kvinnherad

– Det er dei eldre me først og fremst ynskjer å nå ut til. Vaksinasjonsdagar kan ein finna på nett, men det er veke 43 sin er sett av til massevaksinering i regi av Kvinnherad kommune, seier avdelingsleiar for helsestasjonen i Kvinnherad Line Holmedal og kommuneoverlege Glenn A. Opland.

Tre vaksinar

Vaksinasjonsdagane blir fordelte på samfunnshuset i Rosendal og Kulturhuset Husnes.

– Det er korona, influensa og lungebetennelse ein kan få tatt vaksine mot no. Ein kan ta alle tre, men lungebetennelse skal ein berre vaksinerast mot kvart sjette år, så finn it når du sist hadde pneumokokkvaksinen, oppmodar Holmedal og Opland.

Målgruppa for vaksinasjonane er alle frå 65 år og oppover, og kronisk sjuke i alle aldrar. Det inkluderer også barn med ulike tilstandar også, i tillegg til diabetes, kols, astma, for tidleg fødde barn og gravide i 2. og 3. trimester.

– Det er få som har valt å vaksinera barn i målgruppa mot influensa. Det kan ein få time til på helsestasjonen. Me vil tilrå å ta kontakt der for dei som vil vaksinera barna sine. Det er kanskje ikkje så kult å sitja på rekke og rad med dei eldre for å gjera dette, seier Holmedal.

Gravide skal ikkje ta vaksine mot lungebetennelse, men bør dei to andre. Kikhoste i vaksinasjonsprogrammet for gravide også no, opplyser kommuneoverlegen.

– No får dei gravide ein vaksine for å vaksinera fosteret. Det same gjeld for covid og influensa, som ikkje er gunstig å få i slutten av svangerskapet, seier Opland.

Tar du influensavaksinen, så er du ikkje garantert å gå klar av sjukdommen, men får du iallfall eit mildare sjukdomsforløp, påpeikar Opland. Dei med institusjonsplass får vaksinen på sjukeheimen. Helsepersonell får også tilbod om vaksinane.

– Det er ei gruppe me har fått påtrykk for å få vaksinert, dei er kronisk dårlege til å vaksinera seg, seier Opland og Holmedal med eit felles smil.

Sesongbasert

Apoteka set også ein del vaksinar, noko som lettar trykket hos helsesektoren lokalt.

– Dei hjelper oss. Jo lettare tilgang, jo meir vaksine blir tatt, seier Opland, men påpeiker at ein ikkje får tatt koronavaksine på apoteka lenger.

Dei som ikkje har høve til å møta på dei respektive vaksinestadane i veke 43, kan ta vaksinane hos fastlegen eller på helsestasjonen.

– Me har bestilt det me trur me treng av vaksinar – og kanskje litt meir, og satsar på at folk vaksinerer seg, seier Holmedal.

Influensavaksinen er sesongbasert, og det kjem ny vaksine kvar haust fordi viruset endrar seg litt år for år. Koronavaksinen kjem i same rytme no.

– Det er beskyttelse i å ta influensavaksinen kvart år, og det kan vera at det er fjorårets vaksine som til slutt beskyttar deg i år. Barn som ikkje har fått influensavaksine før, skal ha to dosar for å få grunndosen på plass, understrekar Opland.

– Det plar vera god oppslutning blant dei over 65 år, og det pleier å vera god stemning på desse dagane. Det verkar som at mange syns det er sosialt, sluttar Line Holmedal.