Klargjer for oppstart

Om nokre veker vert det ny aktivitet i dei tidlegare lokala til Varaldsøy aldersheim. – Dette blir spennande, seier Ingunn Enæs Gjuvsland og Reidun Gjuvsland Kjærevik i Varaldsøy sanitetslag.

 

I kommunestyret 14. mai sleppte ordførar Hans Inge Myrvold nyhendet om at deler av aldersheimen på Varaldsøy no skal leigast ut til konsernet Stendi. Dei vil nytta lokala til omsorgsbustader innan psykisk helsevern for vaksne.

Huseigar Varaldsøy sanitetslag jobbar no med å klargjera husværa. Arbeidarar frå O. Jacobsen trelast AS på Hatlestrand syslar med å gjera fire rom om til to leilegheiter. Fire andre rom skal verta personalrom. I tillegg skal det vera kontor der, og fellesrommet skal pussast opp.

– Arbeidet er kome godt i gang. Helst skal det vera ferdig til midten av august, og seinast 1. september, fortel Ingunn Enæs Gjuvsland, leiar i Sanitetslaget.

Litt dugnadsinnsats må truleg også til.

– Det har ikkje vore så mykje dugnad enno. Du veit, det er fellesferie og då er det ikkje så lett å få tak i folk. Men vi skal prøva å måla litt på dugnad, opplyser ho.

 

Lokalt tilsette

I fyrste omgang har Stendi bestilt to leilegheiter, men det er rimeleg å tru at dei vil ta i bruk resten av bygninga etter kvart som dei kjem skikkeleg i gang. Leilegheitene blir ganske store, kring 70-80 kvadratmeter, og vil innehalda stove, kjøkenkrok, soverom og bad.

Førebels vil nok dagpersonalet koma frå Bergen, medan nattevaktene truleg vert tilsett her lokalt.

– Og så blir det sikkert fleire lokalt tilsette seinare. Eg trur det vil freista mange å søkja arbeid her, for dei skal jobba omtrent i «Nordsjø-turnus», seier Ingunn.

Reint formelt vert no Heimly, som bygninga heiter, danna om til eit eige aksjeselskap. Varaldsøy Sanitetslag skal eiga alle aksjane, medan styreleiaren, basert på Tysnes, skal ta seg av alt det økonomiske og administrative i aksjeselskapet.

 

Behovet

Basen for den kommunale heimetenesta blir verande i Heimly. Det same med dagtilbodet kvar onsdag med middag og bingo. Sanitetslaget er sjølvsagt nøgde med den nye aktiviteten.

– Heilt fantastisk. Vi har berre fått positive tilbakemeldingar, slår Ingunn fast.

– Det er ikkje bra om bygget hadde stått tomt, supplerer Reidun.

For det er ikkje til å koma frå at framtida til Heimly var høgst usikker då aldersheimen vart lagt ned.

– Vi har prøvd alt mogleg, og tenkt og fundert. Så vi må gje veldig med ros til Hans Inge Myrvold. Det var han som sette oss i kontakt med Stendi og fekk det i gang, kommenterer Ingunn Enæs Gjuvsland.

Stendi og Sanitetslaget har signert ein avtale over 5+5 år.

– Så får vi sjå korleis det går. Behovet er der, og nokre sjansar lyt vi ta, elles får vi ikkje til noko. Men eg trur det blir kjempebra, analyserer Ingunn.