Klare til å ta i mot landets beste bogeskyttarar i Tveitedalen

– Det er slik at ein arrangørklubb alltid får NM to år i slengen. Vi fekk det som kjent for to år sidan, men så kom koronaen og utsette fjorårets arrangement. Difor fekk vi det i år også, seier Atle Helland frå Kvinnherad Bogeskyttarklubb.

Mykje skryt

Klubben fekk mykje skryt frå både deltakarar og publikum etter sitt debut-NM tilbake i 2019. Og med eit arrangør-år på baken har klubben meir erfaring når dei no inviterer til NM i Tveitedalen 13. til 15. august.

– No når vi har gjort det ein gong før, så har alle sine oppgåver og veit kva dei skal gjera. Då vert det heile mykje enklare, seier leiar Terje Bakke i klubben.

Sist dei arrangerte NM var det 130 deltakarar i sving i skogane kring Utåker. Kor mange som kjem i år er framleis uvisst sidan påmeldingsfristen ikkje er gått ut. Men dei fryktar at ein lang koronapandemi vil gjera talet mindre.

– Eg mistenkjer at det kjem litt færre i år, i og med at ting er som dei er. Vi ser til dømes på skive-NM, kor det pleier å vera vel 300 deltakarar, at dei i år er 170 påmeldte. Så det har vore eit stort forfall, det har det, seier Bakke.

Frivillige

Uansett skal Kvinnherad Bogeskyttarklubb gjera sitt for at dei som kjem skal få eit godt meisterskap.

– Det kan du vita at vi skal gjera. Og eg føler at vi ligg godt an, seier Bakke før Helland held fram:

– Vi har jobba mot dette arrangementet i eit års tid no, og er kome godt i gang med planlegginga. I desse dagar held vi på med løypetraseen inne i Tveitedalen. Det å få sett gode løyper er på mange måtar den største jobben, og her har løypeansvarleg Taisto Erkinharju gjort ein kjempejobb, seier Helland.

Men sjølv om ting er under kontroll og dei ligg godt an i planlegginga, treng klubben hjelp både økonomisk og frå frivillige.

– Vi treng både sponsorar og frivillige. Når det kjem til dei frivillige, så er det jo ein god del ting som skal skje denne helga. Kiosksal og det administrative er ein ting, men det er alltid noko som skjer rundt sjølve arrangementet og ute i løypene som vi treng folk til, seier Helland.

– Ja, og i år er ting litt ekstra påpasseleg med covid-19. Så om det er nokon som har lyst til å jobba litt, så er dei hjartans velkomne, seier Bakke.