Klare til å starta opp arbeidet over nyttår

Sidan 2011 har Hardanger Biogass AS jobba med å planlegga og prosjektera eit biogassanlegg i Kvinnherad. I 2019 vart planen om eit anlegg i Sandvikjo i Dimmelsvik presenterte. i 2020 forflytta dei planane for anlegget inn i den grøne næringsparken på Husnes, der det fysiske arbeidet etter planen startar over nyttår.

Søknadsklar

I haust har dei fått på plass rammeløyve for bygging på tomt på Husnes og ein er klar til å søkje ENOVA om finansieringsstøtte. Dermed er planen å starte realisering i januar 2023 og sette i gang bygging.

– Me har vore klar for å koma i gang lenge, og har arbeidd svært grundig med alle puslespelbitane som skal på plass for å kunne realisere anlegget. Bøndene i kommunen har heilt klart den viktigaste rolla, og me har brukt mykje tid på å skriva avtalar på om lag 40.000 kubikkmeter husdyrgjødsel, skriv dagleg leiar Reinhard Lund-Mikkelson i ei pressemelding.

Flyttar biogassanlegg til Husnes

– I september signerte me avtale med Ænes Inkubator på å motta slammet frå deira anlegg. Dette vil bidra positivt til lokal råstoff-bruk og til at me finn synergiar mellom næringar i kommunen, utdjupar Lund-Mikkelson til Grenda.

Han gler seg stort over at dei no er nær ei realisering av eit prosjekt som har røter over ti år tilbake.

Høge prisar

Flytandegjort biogass (LBG) er lik som flytande naturgass (LNG) frå Nordsjøen, men vert produsert i lukka tankar frå rotnande materiale som husdyrgjødsel, død fisk, slam og andre råstoff. LBG kan nyttast som drivstoff eller utnyttast i industrielle prosessar.

– Prisane no er høge, så det hadde vore gunstig å koma i produksjon. Dei langsiktige prisane er også på veg opp. Det er sjølvsagt bra, men ein blir likevel målt mot prisnivået til diesel. Det er ikkje i nærleiken nok biogass i marknaden som det er etterspurnaden etter. Dei store transportselskapa som Posten, Asko og så vidare står klare til å gå over på biogass, når det er nok gass i produksjon, forklarer biogassjefen.

– No er Stord-firmaet Reveno på friarferd til Kvinnherad-bøndene. Er det kamp om råstoffet?

– Det er det. Me har jobba lenge med dette, mellom anna i lag med bondenæringa. Me har investorar i eigargruppa, og me har samarbeidspartnarar som vil investera ytterlegare i oss. Frå bank har me fått på plass ein god pakke, og forsikrar oss om at me får Enova-støtte før nyttår. 25. oktober skal alle søknadane til ENOVA på landsbasis inn. Me har to konkrete prosjekt som me søkjer om, og har to konkrete nye prospekt i andre delar av landet som me ser på moglegheita til å gå inn på i nær framtid, legg Lund-Mikkelson til.

Lagar gass av avfall – og sender næringa tilbake til bonden

Satsar lokalt

Hardanger Biogass skriv i pressemeldinga at dei ønskjer å satsa på lokal arbeidskraft, og å byggja opp kompetanse i Kvinnherad.

– Dette er spesialkompetanse som krev fleire år å bygga opp, men som kjem til å vere avgjerande for vidare satsing på anlegg andre stadar i landet saman med samarbeidspartnarar. Selskapet vil ha behov for tilsette på fleire fagfelt, frå sjåførar til fleire vogntog, logistikkoperatørar, bioingeniørar, prosjekttilsette og administrasjon, fortel pressemeldinga.

Hardanger Biogass inngår som del av Vireo AS, som har som strategi å rulla ut fleire anlegg på landsbasis på same design. I tillegg til Husnes er det eit prosjekt på Lista som er om lag like langt kome, og det er fleire prospekt andre stadar i landet som er i evalueringsprosess.