Klare med planforslaget for bru til Fjelberg

Allereie tilbake i 2008 starta arbeidet med eit fastlandssamband mellom Sydnes på Halsnøy og Fjelbergøy og Borgundøy. I 2017 skaut dette arbeidet ny fart, då bruplanen var ute på første gongs høyring.

– Det stoppa i departementet i 2018, for dei ikkje ville gje ferjeavløysingsmidlar når brua ikkje erstatta Utbjoa-stoppet. Me hadde ein stor jobb opp mot Stortinget for å få løyst dette, minnest Ove Lemicka, styreleiar i pådrivarselskapet Styreleiar Fjelbergsambandet AS.

Godt samarbeid

Planforslaget som kjem opp for utval for plan, teknikk og miljø 24. januar, blir ei andregongs høyring.

– Dette er ein gledas dag. Reguleringsplanen er ferdig frå vår side. No startar den politiske prosessen. Det er eit omfattande arbeid som er gjort no. Prosjektet har blitt betra av tida som er brukt. Det inkluderer ny teknologi og nye industripartnarar som ynskjer å vera med, pluss nye løysingar på veg, sa Lemicka og dagleg leiar i pådrivarselskapet Odd Ivar Øvregård.

Dei store innsparingane ligg i at det er flytebru som det no blir lagt opp til.

– Nye produksjonsmetodar gjer dette monaleg billigare. Ein sparer fleire hundre millionar med dette, vurderte Lemicka.

Det er Kvinnherad kommune som skal losa arbeidet vidare, som om det eigentleg er fylkeskommunen som er byggherre.

– Me har eit godt samarbeid med fagmiljøet på rådhuset og eit samrøystes kommunestyre i ryggen, og det kjem godt med for oss, sa styret i Fjelbergsambandet AS.

Vegstandarden er redusert til 50 km/t. Bruene er planlagde i full breidde, men utan fortauløysing. Deira vurdering er at det ikkje er behov for, gitt trafikkmengda ein ventar på sambandet.

– Ein sparer fort 100 millionar kroner på det. Brua er åtte meter brei, med 6,5 meter køyrebreidde, sa Lemicka vidare.

Avklaringar

Det er gjennomført forprosjekt på begge bruene, som er planlagt bygd i stål begge plassar.

– Me har jobba med vesentlege avklaringar kring ferjeavløysingsmidlane, og ein har hatt omfattande dialog med industrien med tanke på utvikling av flytebruløysingar. Me er spente på korleis det blir når dette kjem ut på anbod, men det er tydeleg at det er fleire miljø i Norge som er interesserte i å rekna på dette prosjektet.

Dei trur at 2024 går til å få reguleringsplanen ferdig. Parallelt vil Fjelbergsambandet AS jobba med å få på plass dei økonomiske sidene.

– For å fremja ein ferjeavløysingssøknad skal ein ha heile prosjektet ferdig innan for +/- ti prosent. Me er nesten i mål, men det er litt som står att. Me trur me klarer det i løpet av året. Då kan fylkeskommunen vedta dette og søkja staten innan 2025. Deretter bør det ikkje vera vanskeleg å få prosjektet ut på anbod etter det, meinte Lemicka.

Planskildringa er på mange punkt ny i forhold til 2017-planen.

– Det er to avklaringar som står att, som er stikkprøvar arkeologisk pluss grunnboring for å sikra kunnskap om grunnforholda. Me vel å gå vidare med dette slik det er no, for geologane vurderer det som overvegande sannsynleg at det ikkje er problem der. Me skal uansett gjera det på eitt eller anna tidspunkt, avklarte Øvregård.

Treng året

PTM-utvalet får planen på sakskartet neste onsdag.

– Vonleg vedtar dei å leggja han ut på offentleg ettersyn. Så kjem høyringsrunden og deretter eventuell innarbeiding av dei innspel som måtte koma der. Dette er mykje av grunnen til at me trur me treng dette året på å koma i mål, sa Lemicka.

Bruprosjektet har fått førehandsavklaring på at det kan få ferjeavklaringsmidlar. Det neste grovsteget på vegen er eit prinsippvedtak i fylkestinget.

– Dette er eit prosjekt me må koma i mål med innanfor det som er av ferjeavløysingsmidlar. Det var i utgangspunktet 21,5 millionar kroner i året i 40 år som er grunnfinansieringa. Staten løyver i tillegg 2,5 prosent prissting på dette. Når me reknar på dette, viss me får behalda alle inntektene, vil me truleg gå ut med overskot til slutt, analyserte Øvregård.

– Det er ein milepåle at reguleringsplanen ligg føre no. Det er handfast arbeid, og det ligg arbeid føre oss på dette også. Men det er kjekt å sjå at me er komne så langt, sa styremedlem Synnøve Solbakken.

– Lokal behandling bekymrar meg ikkje. Det er fylkeskommunen som er dei som må jobbast mest med, slutta Odd Ivar Øvregård.