Klare for vårturistane
I forgje veke skreiv Grenda om turgjengen som kom opp til Fonnabu med dørene på vidt gap og ei hytte full av snø. I helga som var tok hyttetilsynet for Fonnabu- og Breidablikkhyttene turen til fjells for å setja dei i stand og klare til vårskisesongen.
Frå hyttetilsynet var det Nils Gausvik, Siv Framnes og Anne Kari Enes som tok turen, og med seg hadde dei hyttesjefen for Bergen og Hordaland Turlag, Johnny Bjørge.
– Me vil retta ei stor takk til gjengen som var der for ei veke sidan og tok jobben med snøgraving i hovudhytta, der dørene stod opne. Ytterdøra er no sikra med ekstra beslag, og eitt vindauge har fått ny hespe, seier dei i ei pressemelding.
Annonse
Det vart elles utført mindre reparasjonar, grundig utvask og rydding i alle husa.
– No er hyttene klare for å ta i mot vårturistane. Sjølv om vinteren varar lenge endå her oppe, så er tida framover den finaste tida for skiturar på Folgefonna. Ein kan tinga overnatting på Fonnabu på nett, seier dei vidare.
I april skipar Kvinnherad Turlag til den årlege skituren frå Godalen til Rosendal som går over fonna, der det også vil bli overnatting på Fonnabu.
– Det er krevjande skiturar, men fantastisk flott, avsluttar dei.
