Klare for ny ryddeaksjon rundt Hardangerfjorden

– På ny samlast frivillige, næringsliv, lag og organisasjonar for å rydja Hardangerfjorden for plast. I fjor bidrog meir enn 2000 ryddarar på over 160 ryddeaksjonar langs heile fjorden, melder Linda Hjelmeland i Kvinnherad kommune om Rein Hardangerfjord.

Den storstilte aksjonen er 15. september og alle som har lyst til å bidra til eit betre miljø i og langs Hardangerfjorden vert oppfordra til å delta.

– Stort løft

Då ryddeaksjonen starta opp i fjor, var det heile 2000 store og små som gjorde ein innsats for å plukka plast langs fjorden. I Kvinnherad var aktiviteten svært stor, og den vekeslange aksjonen kulminerte med ein gratiskonsert på Skålakaien, der Emma Steinbakken, Stina Talling og Morten Abel spelte.

– Med så mange frivillige i aksjon er dette eit stort løft for heile Hardangerfjorden. Me er veldig glad for at me har med oss kommunane på laget. Allereie har fleire lag og kommunar oppretta ryddeaksjonar. Det er viktig at ein ryddar der ein er, og kommunane har difor ei viktig rolle som koordinator, fortel Helene Sandsten, som er ny prosjektleiar for Rein Hardangerfjord.

Kjem tilbake

Mangeårig plastryddegeneral Kenneth Bruvik har jobba med plastproblematikken i mange år og er ein av initiativtakarane til ryddeaksjonen.

– Ein kunne håpa at ein etter å plukka over 20 tonn med plast, så hadde ein klart å få ein rein Hardangerfjord, men slik er det ikkje. Det er mange plassar me ikkje har rydda, og plasten har diverre ein tendens til å «koma tilbake». Plastforureining er eit av dei store miljøproblema og i fjordane våre hopar det seg opp. Jo fleire som er med å rydde jo lettare blir jobben med å fjerne problemet, seier Kenneth Bruvik i ei pressemelding i samband med aksjonen i neste veke.

Kvinnherad kommune stiller opp for aksjonen, og både kommunekoordinator Linda Hjelmeland og ordførar Hilde Enstad skal vera med og rydda.

– Me stiller sjølvsagt opp for den viktige saka og oppmodar våre innbyggarar og næringslivet til å stille opp denne fredagen. Gjer det til noko sosialt og kjekt å rydde! Slik får me Rein Hardangerfjord, seier Hilde og Linda.