Klar tale: - Me må skjerpa oss
Førre veke var nasjonal strandryddeveke, og fredag før helga samla skulane i Kvinnherad troppane i ein storstilt ryddeaksjon.
Det heile starta i fjor med Rein Hardanger sitt pilotprosjekt om å utvikla ein strategi for rydding av plast og forsøpling langs og i fjordane.
– I fjor var hovudfokuset i Rosendal, i år er det mest i Norheimsund. Der har dei mobilisert med båtar frå både proffe aktørar og private, fortalte Spesialkonsulent miljøretta helsevern i Kvinnherad kommune Linda Hjelmeland.
Annonse
– Sjølv om me rydda masse i fjor så finn me likevel masse i år også, enkelte stader ser det ikkje ut til at me rydda i fjor i det heile. Det kjem mykje frå fiskerinæringa, og enkelte stader er meir utsette enn andre. Det er absolutt eit behov for dette, men folk er veldig entusiastiske og det er ei positiv greie rundt det, fortsette ho.
Engasjerte elevar
Etter lunsj fredag var det andre og tredje klasse ved Omvikdalen skule sin tur til å gjera ein innsats, og heile gjengen toga ned til stranda ved Sandvik i Omvikdalen. Innan Grenda slo fylgje med dei, hadde dei allereie plukka med seg mykje.
– Eg fann heile denne, fortalte Lars, ein av dei ivrige bossplukkarane, og heldt opp ein del av ei takplate som var nesten like stor som han sjølv.
Annonse
Like etter fann ein annan bossplukkar ein heil plastsekk full av sortert plastboss liggjande inni ein busk. Bossplukkarane konkluderte med at den må ha falt av på eit vis og hamna der, heller enn at nokon har hive den frå seg.
Konsentrert gjekk dei vidare med kvar sine posar og tok med seg det dei fann av store og små ting.
– Me var med i fjor også, men det er heilt likt her i år. Me finn vel om lag like mykje, sa lærar Ina Haugland Tvedt.
– Ungane er verkeleg engasjerte i dette. Dei er skikkeleg gode på å leita inni buskar og kratt, heller enn å berre gå langs vegen og ta det dei finn der, legg ho til.
Sjølv seier borna at dei tykkjer bossplukkinga er gøy, men blir litt oppgitte over alt som blir hive i naturen.
– Det er mange som kastar, og mykje kjem også inn frå havet. Dyr kan jo skada seg, sa 3. klassingen Lilja.
Annonse
Elevane i andre og tredje klasse ved Omvikdalen skule veit i alle fall kva dei vil seie til alle som hiv boss i naturen;
– Dei er dumme, kom det frå éin.
– Me må skjerpa oss, sa nokon andre.
– Sjå meg på bileta, ropte ein annan.
