Klar for Seilas

Martin Myrvold frå Hatlestrand satsar friskt i det nye året. Han har sagt opp butikkjobben og går no hundre prosent inn for å starta opp storkiosken Seilas på Gjermundshamn ferjekai. No håpar han på medvind i segla.

Interiørtema i den nye kafeen er maritimt, og fargen bak disken vert sjølvsagt blå. Besten har snikra 40 eplekassar, som skal bli hyller i landhandelstil. Myrvold håpar å starta opp på laurdag, men før det er det mykje som skal på plass. Inst i lokalet blir det sportskrok, med sitjeplassar og fotball på tv-skjermen. Ytst ved vindaugo kan folk som skal med ferja sitja ned og ta ein matbit medan dei ventar.

– Her får dei full oversikt når ferja kjem og går, seier Myrvold.

Dersom bygde- eller hyttefolket har gløymt å handla mjølk til søndagen, skal det bli ei råd med det og i den nye storkiosken. I butikkhyllene vert det litt enkle daglegvarer i tillegg til typiske kioskvarer.

– Eg trur søndagane blir min dag, og satsar på å selja ferskt brød på søndagane i høgsesongen, fortel Myrvold.

 

Luksusversjon av hurtigmat

Maten som skal lagast til på kjøkenet vert ein oppgradert versjon av hurtigmat.

– Det blir rask mat, men i litt anna stil enn typisk gatekjøken. Her blir det ferske burgarar, litt ekstra god pommes frites og brød, og så skal det serverast med heimelaga dressing, lovar 22-åringen.

I vinterhalvåret satsar han på å halda ope fem dagar i veka, onsdag til søndag, medan det vert ope kvar dag i høgesesongen. Han har allereie fått tak i helgehjelp.

– Det er viktig, eg skal jo spela litt fotball også – særleg på søndagane, smiler forsvarsspelaren til Strand-Ulv.

Dei to siste åra har han jobba fullt på butikken på Hatlestrand, og der har han også vore ekstrahjelp sidan han var 13. Han har også erfaring frå det same lokalet han no skal inn i, den gongen det heitte BrukBar. Av studiar har han eitt år med marknadskommunikasjon, men no trur han ikkje det blir meir studiar med det første. Men den blide, unge mannen har i alle fall plenty erfaring frå servicebransjen.

– Eg er spent på om det slår til, dette her, og håpar at det kan bli ein sosial samlingsstad både for fastbuande og reisande, seier kapteinen på den nye «skuta» på kaien, som berre har eit målingsstrok att før ho er heilt klar for seglas.