Kjernekraft vart eit heitt tema

Avslutningsvis i valdebatten på Husnes i førre veke tok ordstyrar Morten Nygård alle ordførarkandidatane med på ein såkalla Snøggduell, der blant anna kjernekraft blei ei heit potet.

– «Snøggduell» var det beste ordet me kunne kome på som erstatning til «Quick fire-runde», smilte den joviale Grenda-journalisten før han sparka det heile i gong.

I duellen skulle altså kandidatane svara så kjapt som råd på ulike spørsmål. Fyrste tema Nygård tok opp var kjernekraft. Nokre var for, andre var mot, medan dei fleste var einige om at det i alle fall ikkje er farleg å undersøka.

Modulære kjernekraftverk

– Altså, dersom alternativet er vindkraft så tenkjer eg at det er noko me vil vurdera, sa Jostein Rødland frå Industri- og næringspartiet (INP).

– Me er veldig positive, og me meiner at tida absolutt er inne for å ta denne debatten i det offentlege rom. Dessverre må det lovendringar til for å få det til, så då må alle partia som er for jobba inn mot sine parti slik at ein kan få fortgang på dette. Me kan gjerne senda eit tydeleg signal frå Kvinnherad kommunestyre om at me kan sjå for oss små modulære kjernekraftverk her, meinte Kent Are Kjørsvik Petterson frå Venstre.

Også Arbeidarpartiet og Høgre var positive til kjernekraft i framtida.

– Eg var på Høgre sitt landsmøte og stemte «Ja» til kjernekraft, så me seier «Ja» til utvikling. Men slik som Jostein (Rødland, INP) sa, dette er ikkje noko som kjem til å skje i denne 4-års perioden, sa ordførarkandidaten frå Høgre Vegard Bjørnevik.

Både Miljøpartiet De Grønne (MDG) og Sosialistisk Venstreparti (SV) var derimot heilt tydelege i si meining, dei ynskte ikkje å gå inn for kjernekraft.

– Me meiner at det ikkje er noko grunn til at me skal gå inn på dette området. Kor skal me i så fall ha deponia, kva skjer dersom me godkjenner kjernekraft? Me har eit landsvedtak på dette, og me har eit fylkesvedtak på dette og me har ei lokal innstilling på å fylgja det, understreka Silje Nordtveit Olsen frå SV.

– Men kan du seia «Nei» til både vindkraft òg kjernekraft? Kor skal de då henta straumen i frå? kontra Nygård.

– Me skal henta straumen med å ha havvind, i tillegg til at me må få ned forbruket vårt og vera kritiske til kva industri me tillét og byggjar ut i kommunen, svara Olsen.

Auka gjeld

Neste tema tok for seg økonomi, og Nygård sparka ballen fyrst til Alf Jarle Langeland og KrF der han blant anna tok opp at dei i partiprogrammet sitt seier at dei ynskjer forsiktig pengebruk.

– Meiner du at dei andre partia er for slepphendte med pengebruken?

– Ja, det synest me. Me låner meir og meir, og me veit alle at jo meir me låner jo meir må me stramma inn. Rentekostnadane stig frå 29 millionar i 2021 til 97 millionar i 2026, lånet stig, og økonomisjefen seier at me i 2026 får eit underskot på 97 millionar. Eg er bekymra for korleis me skal løysa dette med til dømes eldreomsorg når me låner stadig meir, sa Langeland.

Ove Lemicka for FrP deler bekymringa til KrF, men påpeikar samtidig at Krf også har vore med på å stemma for vedtak om både Husnes skule, Valen skule og utbygging av Rosendalstunet.

– Me må vera realistiske her, gjelda kjem til å auka, og alle partia her kjem til å gå inn for å auka gjelda, understreka Lemicka.

MDG tok også til orde for å stogga pengebruken i framtida.

– Med dei vedtaka me har gjort så kjem me dessverre til å auka gjelda, men utover det så må me faktisk stoppa. Renta er tredobla og det går sjølvsagt utover drifta. Me meiner derimot at det er mogeleg å drifta kommunen på omtrent halvparten så mykje straum som ein brukte i 2020, poengterte Jostein Saghaug for MDG.

Arbeidarpartiet med Thea Vaage fekk siste ordet i snøggduellen og meinte i motsetnad til MDG at det ikkje låg så mykje å henta i innsparing på straumbruken.

– Kommunen bruker konsesjonskraft no, som er veldig rimeleg for kommunen å bruka, så eg trur ikkje det er så mykje der å henta. Det Arbeidarpartiet vil jobba for er å få ned sjukefråværet og få vekk bruken av desse vikarbyråa, det vil spara oss masse pengar i året, sa Vaage.