Kjerkol opnar for at dei med tre dosar skal sleppe bekreftande pcr-test

Også dei som har tatt to dosar koronavaksine og som har gjennomgått koronainfeksjon i løpet av dei siste tre månadane vil sleppe å ta den bekreftande pcr-testen. Følgjeleg vil personane dette gjeld for sleppe å oppsøke ein teststasjon.

Det er samstundes ønskjeleg at dei nyttar seg av dei kommunale løysingane for registrering av sjølvtestar. Bakgrunnen for endringane er at sterkt aukande smitte utfordrar kommunane sin testkapasitet, heiter det i ei pressemelding frå regjeringa.

20. januar ba regjeringa Helsedirektoratet og Folkehelseinstituttet om ei vurdering av testsystemet, med svarfrist på eit døgn. Svaret kom såleis 21. januar, og ut frå dette vart det klart at det ikkje var behov for at gruppene som er nemnd over skulle få bekrefte positiv koronasmitte gjennom ein pcr-test.

- På bakgrunn av svaret frå etatane har eg gitt Helsedirektoratet og Folkehelseinstituttet i oppdrag å ha snarleg dialog med kommunane og oppdatere anbefalingane om kven som skal få tilbod om bekreftande pcr-tester, seier Kjerkol i pressemeldinga.

På landsbasis har nesten 2,5 millioner tatt tredje dose. I tillegg kjem dei som har fått to dosar og har gått gjennom infeksjon dei tre siste månadane. Dette utgjer ein stor del av befolkninga, og endringa vil dermed avlaste kommunane. Endringa vil ikkje føra til endringar for status i koronasertifikatet, då desse gruppene allereie vert sett på som fullvaksinerte.