– Kjenner oss ikkje trygge
Den 8. oktober arrangerte Motvind Norge vardetenning for fjerde året på rad. På Husnes møtte vel 80 stykke opp for å visa si motstand til vindmøller på land.
Publisert
Sist oppdatert
Denne laurdagen var det ei noko spent stemning blant alle dei frammøtte på Frøysteingarden på Husnes. Annemor Ekeland var klart nøgd med oppmøtet og med alt arbeid som til no er blitt gjort.
– Men vi kjenner oss framleis ikkje trygge, sa ho i innlegget sitt.
Annonse
Håkon Røstbø sang «Husnessongen» og Arne Torget framførte diktet «Vår framtid og vår arv» som klart sa ifrå kva han tenkjer om vindkraft på land.
«La vardane varsla, kampen er starta. Lat oss hegna om fjellet, vår arv og vårt hjarta. Det handlar ikkje om kubikk og granitt. Fjellet er felleskapet, det er mitt og ditt».
Klokka 19.30 var det klart for at varden skulle tennast. Då kom det ein flokk med dansande huldrer ned frå Mjelkhaug som tente på og dansa rundt flammane.
Tilsynelatande vindstille
Annonse
Terje Kollbotn haldt til slutt ein oppglødd appell til dei frammøtte, som med nikk og klapp sa seg einige i det som vart sagt.
I fylkestinget i Rosendal i juni retta han spørsmål til fylkeskommunen om kvifor dei skulle senda ut eit nytt brev til kommunane i Vestland fylke og spørje om dei hadde planar om vindkraftutbygging.
– Fylkesordførar svarte at eg kunne ta det heilt med ro, og viste til eit vedtak i fylkestinget som seier at i Vestland fylke skal det ikkje byggast ut vindkraft dersom det trugar naturinteresser, naturmangfaldet, friluftslivet, eller det biologiske mangfaldet. Heller ikkje om det går på tvers av lokaldemokratiet, sa Kollbotn og haldt fram:
– I fylkestinget sist veke spurte Rødt; har fylkeskommunen fått svar? Det var 26 av fylkeskommunane som hadde svart. Og alle 26 hadde svart at det var ikkje aktuelt på noverande tidspunkt med vindkraftutbygging i vår kommune. Dette viser at den lokale motstanden er enormt sterk i Vestland. Men det er tilsynelatande vindstille akkurat no. Det er eit vindkrafthysteri på gang, som må møtast med motstand frå dag ein. Eg sendte ein melding til Annemor i går og spurte om det er nokon som har søkt på nytt om vindkraftutbygging i Kvinnherad. Svaret var «førebels ingen, men om dei prøver seg blir det månelyst!», slutta Kollbotn.
