Kjempestart for ny kafé

Den nye samlingsplassen på Husnes Storsenter opna som planlagt i går. Då gitteret gjekk opp hadde dei enno ikkje fått kassen på plass, men likevel gjekk dei første timane svært bra for den nye samlingsstaden på Husnes.

Charlotte Berntsen fortel om ei hektisk opning for Bra Lunsj Café.

– Det har vore heilt enormt med folk, så dette har vore ein skikkeleg pangstart. Me har selt utruleg mykje, særleg donuts. Men det har òg gått ein del club sandwich og salatar, samt mykje iste og iskaffi, opplyser ho medan dei tilsette har meir enn nok å henga fingrane i bak disken.

Måtte testa

Eline Teigen er ein av dei nytilsette på kafeen.

– Eg skal jobba her i sommar, i helgane og etter skulen, smiler ho blidt.

Blant kundane som var innom samstundes som Grenda tok kafeen nærare i augesyn, var 15-åringane Erlend Blokhus, Kevin Kvernenes og Geir Hillestad. Dei var tidleg ferdige på skulen, og nytta høvet til å smaka på nokre av donutsane som pynta opp disken.

– Me måtte testa donutsane, så no har me smakt på Oreo, ein karamell med fudge og ein med smash, forklarar Erlend.

Sakna kafé

Dommen er dei samde om:

– Dei var veldig gode!

– Kva variant ville de anbefalt vidare då?

– Oreo! svarer den samstemte trioen.

At senteret har vore utan kafé, er noko ungdommane har merka.

– Me har sakna ein kafé her. No har me endeleg ein plass å sitja, seier Geir nøgd.