Kjem med tre spørsmål til ordføraren før dagens kommunestyremøte
Ove Lemicka (Frp) kjem torsdag føremiddag med tre spørsmål til ordførar Hans Inge Myrvold før kommunestyremøtet i ettermiddag.
Frp-representanten tek opp Espira Halsnøy Kloster barnehage, Hansalio byggjefelt på Sandvoll og protokollføring frå offentlege møte i sine tre spørsmål til ordføraren.
Artikkelen held fram under annonsen.
Fyrst spør han om ordføraren vil ta initiativ til at kommunen skal vurdera søknaden om utviding av Espira Halsnøy Kloster barnehage på nytt.
– No viser det seg i ettertid at fleire av forklaringane frå administrasjonen for å avslå søknaden er heller tvilsame. Behovet for nye plassar er feil vurdert, då administrasjonen har gitt feil informasjon om venteliste. Det er ikkje tre born på venteliste, men minst 13 born som ventar på plass. Vil ordføraren ta initiativ til at kommunen vurderer søknaden på nytt i lys av nye opplysingar, slik at foreldra på Halsnøy kan få naudsynt barnehagedekning, og at det vert grunnlag for vidare vekst i folketalet der, spør Lemicka.
Når det kjem til Hansalio byggjefelt på Sandvoll, ynskjer Lemicka forsikringar frå ordføraren.
– Kan ordføraren forsikra kommunestyret om at det no vert regulert inn veg der BKK allereie har laga veg? Dersom dette no er sett i gang, kan ordføraren straks syta for at tomtene som er søkt om vert frådelte, slik at utbyggjaren og kan få koma i gang med bygging og sal av hytter i Hansalio, spør Lemicka.
Protokoll
Det siste spørsmålet Frp-representanten tek opp handlar om protokollføring frå møte.
– Eg er blitt gjort merksam på protokollar som er ferdige etter møter i til dømes forvaltningsutvalet og PTM-utvalet, mange dagar etterpå ikkje vert lagt ut fordi kommuneadministrasjonen skal gå gjennom og godkjenna dei. Dette kan ikkje vera rett, då det må vera leiaren i det einskilde organet si plikt å syta for slik gjennomgang, for så at utvalet sjølv tar stilling til protokollen som sak i neste møte, skriv Lemicka og held fram:
– Kan ordføraren forsikra kommunestyret om at ein slik praksis der administrasjonen godkjenner protokollane vert avvikla og at rett sakshandsaming vert innført ved at den politiske valde møteleiaren og utvalet sjølv gjer den jobben?