Kjem med si tredje bok

Myklebust fortel at ho er på sitt tredje år som innlagt på Valen sjukehus, og etter å ha skrive to bøker frå dei to føregåande åra, så var det naturleg å skriva éi til.

– Eg tenkte at sidan eg framleis er innlagt, så kan eg lik så godt skriva ei bok til. Alle bøkene mine er sjølvbiografiske bøker, berre i lyrikkform, fortel forfattaren.

«Live-skriving»

Den tredje boka skal heite Psykt fastlåst, og handlar i likskap med dei to føregåande bøkene om livet som innlagt på lukka avdeling.

– Eg skriv om litt forskjellig, men den handlar om alt frå luftambulanse til brystkreft og terapimåka Peder. På ein måte er det ein oppfylgjar til dei to andre, men det er jo veldig mykje forskjellig som skjer i løpet av eit år, seier Myklebust.

Vidare fortel ho at skrivinga både er terapeutisk i seg sjølv, men at det også er viktig for ho å vera open om livet sitt.

– Eg gjev jo berre eit syn frå mitt perspektiv, det er mi historie, men eg er for openheit og det å kunne gje eit innblikk i korleis livet kan sjå ut som tvangsinnlagt i psykiatrien. Eg trur også det kan hjelpa mange til å forstå litt meir korleis ting kan vera og sjå ut, understrekar ho.

– Det er jo mange som har skrive bøker om temaet, men det er gjerne ikkje medan dei har vore innlagt. Ein kan jo nesten kalla dette for «live-skriving», for eg skriv om det medan det pågår, legg ho til.

Vegen ut

Myklebust er også takksam for alle dei gode tilbakemeldingane ho har fått på bøkene sine.

– Mange har sagt at dei har lese ferdig boka med éi gong, og at det er veldig sterke og brutalt ærlege bøker, men også rørande og kanskje litt sterk kost for nokon. Det har stort sett vore gode tilbakemeldingar, fortel Myklebust.

– Når eg sit og skriv så kjem det veldig lett og det er enkelt å vera brutalt ærleg. Eg likar jo at det ikkje ligg så mykje mellom linjene, men det er skummelt å utlevera seg på den måten når boka fyrst kjem i trykken. Men heldigvis så har eg berre fått gode tilbakemeldingar, og folk har vore både positive og støttande, legg ho til.

På spørsmål om det kjem fleire bøker fortel ho om fleire nye idear.

– Ja, eg trur det blir fleire. Eg har lurt litt på å fortsetja å skriva om vegen ut, korleis eg er i ein utskrivingsprosess og korleis det er å koma heim for godt, fortel forfattaren. Eg er også med i ein slik diktantologi der eg har fått med eit dikt i eit anna prosjekt. I tillegg har eg også fleire idear om kva eg vil skriva om, så eg trur ikkje dette blir siste boka eg gjev ut, forsikrar ho avslutningsvis.