Kjem heile regionen til gode

Med ei løyving på 1 million ekstra i driftsmidlar blir museet betre rusta til å drifta og forvalta samlingane og den store bygningsmassa dei har ansvar for. Dette er dagleg leiar, Linda Øen, svært glad for.

– Vi har søkt kulturdepartementet om auka driftsmidlar kvart år, der vi har peika på kva vi treng for å kunne levere det som vert forventa av oss som museum. Og i år har vi endeleg fått. For oss er det ei stor gåve, seier ho.

Slik Øen har forstått løyvinga, vil dette vera ei auke dei kan budsjettere med, også i åra framover.

– Museumsmeldinga som kom tidlegare i år la jo opp til ei styrking av kystkultur, noko vi jobbar mykje med her hos oss. Det er på dette grunnlaget vi har blitt tildelt desse midlane, slår ho fast.

Som løyvinga formidlar, er det drifta som skal aukast. Korleis midlane vil bli fordelt er enno ikkje klart, men i søknaden som vart sendt til Kulturdepartementet peika dei mellom anna på at det var behov for å auke bemanninga.

Får positive følgjer

Då Sunnhordland museum mellom anna har fleire bygningar og tun dei forvaltar i Kvinnherad; Halsnøy kloster, Nistovetunet (Omvikedalen), Hauahuset (Omvikedalen) og Gjerdetunet (Mauranger), kan ein venta at også drifta av desse vil bli styrka. Samstundes peikar Øen på det også vil kunne koma lokale organisasjonar og samlingar til gode:

– Med auka bemanning kan vi nå ut til fleire. Om det er private samlingar eller lokale organisasjonar som til dømes treng hjelp til handtering eller registrering av gjenstandar, er vi jo også ein kompetanseorganisasjon for dei.

Museet sitt budsjett for 2022 er framleis under arbeid, og skal presenterast for styret seinare i år. Etter styremøtet vil dei vita meir om korleis den gledelege auken vil bli nyttegjort.