Kjeldekritikk er no ein del av eigenberedskapen

I samband med Eigenberedskapsveka førre veke sendt DSB (Direktoratet for samfunnssikkerheit og beredskap) ut ein brosjyre til alle norske husstandar med råd om eigenberedskap. Der er kjeldekritikk eitt av punkta, noko Medietilsynet støttar.

– Medietilsynet er glad for at kritisk medieforståing, som blant anna handlar om den enkelte sin kjeldekritikk, no er med som ein del anbefalingane til eigenberedskap, seier direktør Mari Velsand, i ei pressemelding.

Norske myndigheiter tilrår elles at alle husstandar skal vera budd på å klara seg i éi veke dersom straum, tele- eller mobilnett og internett blir borte. Brosjyren inneheld tips, råd og tilrådingar for ein slik mogleg krisesituasjon.

Fem tips

Når det gjeld media og nyhende, kjem DSB med fem enkle og gode råd om kjeldekritikk.

* Søk informasjon frå myndigheiter og redaktørstyrte journalistiske media.

* Ver ekstra på vakt når du får informasjon som verkar overraskande, skremmande eller gjer deg sint.

* Sjekk kven som står bak informasjonen du får. Nokon kan spreia feilinformasjon med vilje.

* Ver merksam på at både tekst, lyd, bilete og video kan manipulerast.

* Tenk over kva informasjon du deler vidare.

– Dette er råd som vi alle bør følgja, også i kvardagen. Den teknologiske utviklinga gjer at det stadig blir lettare både å produsera og spreia feil- og desinformasjon, og vanskelegare å oppdaga. Derfor er det så viktig å gå til truverdige informasjonskjelder, som redaktørstyrte media, seier Velsand.

– Vi stiller oss bak råda frå DSB, og oppmodar til å stoppa opp og tenka kritisk i møtet med informasjonsstraumen på digitale flater. Bruk litt tid på å sjekka kjelda, eller om andre kan bekrefta informasjon eller nyheiter du er usikker på, legg ho til.