Kjærkomen hjelp for dei i etableringsfasen

Malin Eikesdal og Inga T. Øye tykker vel om ordninga som vart offentleggjort onsdag.

For unge familiar i dag er det ikkje alltid enkelt å få kabalen til å gå opp når det kjem til bustadlån, studielån og planar om å få barn. Dette veit både Malin Eikesdal og Inga T. Øye mykje om. Begge to er nyutdanna og har slått seg ned i kvar sin tomannsbustad på Valen.

Eikesdal fortel at sambuar, Joakim Myklebust, kjøpte hus medan ho var student.

– Han kjøpte ein tomannsbustad då eg var student, og så kjøpte eg meg inn i fjor etter at eg var ferdig utdanna, fortel Malin, som jobbar på Husnestunet som sjukepleiar.

Malin peikar på ein utfordrande økonomisk realitet for mange unge familiar:

– Når ein får barn, får ein mindre i lån. Ein får redusert lånemoglegheita med 500.000 kroner per barn, og då er det snakk om 1,5 millionar dersom ein får tre barn. Samstundes treng ein større bustad for å få plass til barna, forklarer ho.

Dette gjer at mange må prioritere kva som kjem først, og for Malin og Joakim var det viktig å sikre seg ein bustad før dei starta med familielivet.

Set pris på tiltaka

Inga T. Øye jobbar i heimesjukepleien hjå heimetenester Husnes. Ho ser for seg ei framtid i einebustad for ho og sambuaren og dei to barna deira.

– Vi vil nok etter kvart ha større plass, kanskje kjøpe oss eit hus, men det krev jo eit nytt lån, så vi må planleggje godt, påpeikar Inga.

Ida set stor pris på dei økonomiske tiltaka og påpeikar at ho synst det er bra at dette ikkje berre er for dei nye som kjem til kommunen, men òg gjeld dei som allereie er etablerte.

– Det er mange som har hatt studielån i lang tid og som framleis slit med det. Det er bra at tiltaka ikkje berre rettar seg mot rekruttering, men også hjelper dei som har vore i arbeidslivet ei stund, seier Inga.