Kartverket går imot tilrådinga frå Språkrådet i samband med skrivemåten for tunell

Nyleg vart det klart at tunellen på Kroka skulle skrivast med ein n og to l'ar i «tunell». Når Kartverket skal fastsetja tunellnamn, går dei for motsett skrivemåte.

Tunellen som no har blitt gjeve namn, etter etterlysing frå Kartografiseksjonen i Kartverket, er ein på kraftvegen opp til Mysevatnet i Mauranger.

Etter at Kartverket hadde vore i kontakt med kommunen, vart «Møsevasstunnelen» føreslått som høveleg. Statkraft, som eig kraftverket, hadde også ei meining i saka, og ynskja å kalla den «Mysevanntunellen».

Det er Kartverket som har vedtaksmynde for skrivemåten når det gjeld statlege anlegg, men dei har, til liks med andre med vedtaksmynde i tunell-namnsaker, vore i kontakt med Språkrådet.

Fylgjer normeringspraksis

Språkrådet har også i dette høvet tilrådd ein n og to l'ar i skrivemåten for «tunell».

«Det er ein eintydig normeringspraksis for skrivemåten -tunnelen i tunnelnamn i Kvinnherad. Den skrivemåten har òg sterk normeringspraksis elles i Vestland fylke og i resten av landet. Det vil difor vera ulemper med å nytta ein annan skrivemåte enn den som fylgjer av innarbeidd normeringspraksis», skriv Kartverket i brevet der dei fastset tunell-namnet.

Endeleg namn på denne tunellen blir difor Mysevasstunnelen.