Kartlegging av sjøaurebekkar i Kvinnherad

«Dette kan vera mindre bekkar og sidebekkar til større vassdrag, som sjøauren nyttar eller tidlegare har nytta som gyte- og oppvekstområde», står det å lesa i nyhendebrev frå landbrukskontoret.

Målet med kartlegginga er å avdekka korleis forholda i vassdraga er for sjøauren no. Ein vil også definera moglege flaskehalsar for produksjon av ungfisk. Ein rapport skal visa utfordringar vurdert etter vassforskrifta, og gje forslag til tiltak for å betra gyte- og oppvekstområda for sjøaure i kvar enkelt bekk og vassdrag.

Lokale innspel innan 10. oktober

Kartlegginga er igangsett av Sunnhordland Vassområde, som ligg under Vestland Fylkeskommune. Bakgrunnen for undersøkingane er at sjøaurebestanden er under hardt press. Prosjektplanen fortel om ei veksande krise.

«I små vassdrag møter sjøaure problemet med lakselus og det enorme trykket frå vegbygging, landbruk, grøfting og forureining.», kan ein lesa i prosjektplanen.

Sunnhordland Vassområde ynskjer lokale innspel til kva bekkar og vassdrag dei bør undersøka, som har, eller har hatt sjøaure. Innspela må koma Sunnhordland Vassområde i hende innan 10. oktober. Etter dette vil dei invitera til ei samling i Kvinnherad for å gå gjennom innspela.

«Me ønskjer å undersøka fleire og mindre sjøaurevassdrag i Sunnhordland som me veit for lite om til å kunna ta godt vare på sjøaurehabitata», utdjuper Kari Bjørndal frå Sunnhordland Vassområde.