Kåra til Gasellebedrift: – Stor stas

«DN Gaselle» er ifølgje avisa Dagens Næringsliv «ei kåring av Norges råaste vekstbedrifter». For å bli Gasellebedrift må du oppfylla følgjande krav:

* Omsetning på over 1 million kroner fyrste år og 5 millionar siste år.

* Minst dobla omsetninga over fire år.

* Leverte godkjende rekneskapar.

* Positivt samla driftsresultat.

* Har vore aksjeselskap.

* Unngått fallande omsetning.

No er grunnarbeids- og brøytefirmaet Sau & Sånt AS frå Halsnøy kåra til Gaselle.

– Det er kjekt og stor stas. Eg hadde ikkje forventa det, ikkje no i alle fall, så det tok meg litt på senga, seier dagleg leiar Bernt Mehammer Tofte til Grenda.

Han har allereie fått diplomet i hus, og skal nok finna ein fin plass å henga det.

– Trur du ei slik kåring får noko å seia for bedrifta?

– Ja, det må vel verka positivt. Det kan jo ikkje vera negativt. Alle reklame er god reklame, kommenterer Tofte.

Tre brør

Sau & Sånt AS vart etablert i 2018, og i det fyrste heile driftsåret, 2019, noterte dei seg for 2,1 millionar kroner i driftsinntekter. I fjor nådde selskapet ei omsetning på 7,2 millionar kroner og fekk eit driftsresultat på 711.000. Ifølgje Dagens Næringsliv har veksten siste tre år vore på heile 257,85%.

Dagleg leiar er Bernt Mehammer Tofte og styreleiar er Geir Sverre Tofte. I styret sitt to karar til med same etternamn, nemleg Bjarne og Brede. Det er brørne Bernt, Bjarne og Brede som eig selskapet. Dei to fyrste jobbar der sjølve, medan Brede har arbeidsplassen sin i Nordsjøen.

– Vi er seks fast tilsette, men vi har også mange som er inn og ut, så i alt har eg 22 på lønningslista, fortel Bernt Mehammer Tofte.

– Korleis ser 2024 ut?

– Jau, det blir bra. Det skal gå mykje gale dei siste 14 dagane viss det ikkje skal bli eit nytt rekordår, seier han.

Ny E16

Av større oppdrag i år trekkjer Bernt Mehammer Tofte fram vegarbeidet på Varaldsøy for Kvinnherad kommune, i tillegg til diverse oppdrag for Mesta og Vestland fylkeskommune. Bernt sjølv tok før sommaren turen austover til Sollihøgda for å jobba på den nye E16 mellom Sandvika og Skaret.

Sau & Sånt AS er elles store på brøyting. Dei har ansvaret for strekningane Dimmelsvik-Åkra, fylkesvegen til Musland i Uskedalen, og dei kommunale vegane på Husnes, Sunde og Halsnøy, i tillegg til gang- og sykkelvegar/fortau mellom Herøysundet og Årsnes. I alt dreiar det seg om kring 160 kilometer. Men Bernt Mehammer Tofte tykkjer ikkje det er for travelt.

– Det er sånn midt på treet, vi kunne hatt meir. Så no ventar vi på snøen, smiler han.

På spørsmål om Gasellekåringa skal feirast, seier han:

– Nei, vi får sjå. Jula får koma fyrst.