Kåra dei flottaste elghundane

60 hundar viste seg fram frå si beste side under utstillinga Hordaland Elghundklubb arrangerte på Seglem skule i helga. Arrangørstaben var i stor grad frå Kvinnherad, og lokalforeininga har arrangert slike elghundutstillingar fleire år no.

– Tidlegare har me vore både i Tveitedalen og Uskedalen, medan det no var tredje året ein arrangerer her på Seimsfoss, fortel Tore Furdal.

Mange kvelpar

Først ute var jemthundane og dei grå elghundane. Så gauv dommarane laus på dei svarte elghundane. Først kvalpane, før dei jobba seg gjennom juniorhannar, eldre hannar, juniortisper og dei eldre tispene. Etterpå kåra ein beste hann og beste ho, før ein av hundane endar som «Best in show», altså den finaste på heile utstillinga.

Då Grenda var innom på laurdag stod tispene for tur. I alt var det 60 hundar som stilte seg ut, fem grå elghundar, éin jemthund, resten svart elghund.

– Har ikkje hatt så mange kvalpar med som no på årevis, meinte Anita Lie, som etter kvart er blitt ein svært røynd oppdrettar.

– På austlandet er det meir grå elghund, mens her er det svarthundane som dominerer, legg Anita til.

Avl

Å stilla ut hundane handlar om meir enn berre få visa fram ein fin hund, og kanskje få ei sløyfe i premie.

– Dei hundane som er med på utstillinga går mot championatet, seier Tore Furdal og forklarer utstillingschampionatet som ein standard samanliknar hundane opp mot. For at ein hund skal bli ein del av den standarden, må hunden ha plukka med seg eit knippe utmerkingar på vegen.

– Det handlar om avling, og blir eit mål på om hunden er fin å sjå til. Denne utstillinga handlar om utsjånad og bevelgese. I tillegg køyrer ein eigne jaktprøvar på hundane, og alt dette blir knytt opp mot stamtavla til hundane, forklarer Tore Furdal.

– Eg har no levert frå meg kvelpar, og eg oppmodar alltid dei nye eigarane om å ta dei med seg på utstilling, slik at ein kan fremja rasen. Mange reiser på utstillingar for å finna og knyta kontaktar med hannar som dei vil kryssa med sine tisper med for framtidig avl, legg han til.

Langvegsfarande

Påmeldingslista viser tydeleg at utstillingar som denne er viktige for mange å få med seg. Både Evje, Frogner og Venabygd stod på lista. Blant dei langvegsfarande var hunden Storm frå Spydeberg.

– Storm er eigd av Morten Kvisler, men det er eg som får lov til å reisa hit med han, smiler Ellen Rusvik.

Eg får lov til å ta del i det med å få han til å bli utstillingschampion. Me køyrte frå Moss og hit i natt, deltar på utstillinga og køyrer heim igjen etter utstillinga er over, smiler ho.

Storm er ein tre år gammal grå elghundsom plukka med seg godt med sløyfer, og fekk vurderinga «Excellent» av dommaren i utstillinga.

– Vestlandet er svarthundens rike, og grå har vore meir utbreidd på Austlandet og nordover. Me ser det kjem meir svarthund austover no. Det skjer fordi det kjem meir ulv inn i terrenga ein jaktar i, og dermed er det ein fordel med ein bandhundar. Det er ikkje dei grå elghundane, og mange skiftar derfor til den svarte rasen, forklarer Røsvik.

Brukshund

I alt 19 lokale hundar deltok på utstillinga, førte fram av blant andre Åsmund Hjelmeland, Anita Lie, Vidar Hellås, Kristina Mehl og Lars Henrik Skogtun.

Fleire av hundane kunne reisa frå utstillinga med dei beste skotsmåla ein får. Blant dei var Vidar Stene Hellås sin Tinka.

– Godt skore hovud, pene auge og øyre, har ein bra hals overlinje, rakt kryss og vel ansats, bra ring i hale, veldig flotte bein og bevegelsar. Excellent, doserte dommar Arild Berget etter at Hellås hadde sendt Tinka på tur inne i utstillingsarealet.

Elghunden er ein brukshund som trivst godt i skogen, meiner Furdal og seier at elghunden fungerer godt på alle dyr som hjarta går på, ikkje berre elg. Sjølv er han ein ihuga hjortejeger, men også aktiv i Kvinnherad Ettersøkslag, og tispa hans Trixie har spora opp eit etter kvart betydeleg tal påkøyrte hjortar, noko som langt på veg provar påstanden hans.

– Svart elghund passar veldig godt til den forma for jakt som me har her, sluttar ein nøgd Furdal.