Kantra båt har røter i Kvinnherad

Det dei kallar eit vikingskip er eigentleg ein tradisjonell Færøybåt, bygd på materialar frå Sunde og Ænes.

Seks personar var om bord den opne båten då den kantra utanfor Stadt. Båten var på veg frå Færøyane til Trondheim, ein tur båten har segla før.

Om lag klokka 22 tysdag meldte HRS at fem personar var plukka opp av helikopter.

Dei fem er i god behald og vart frakta til Florø, der dei vert teken vare på av helsepersonell. Det skjer framleis søk etter ein siste person, skreiv HRS på X/Twitter.

Den sjette personen vart bekrefta omkomme tidleg onsdag morgon.

Materiale frå Kvinnherad

– Det var kjedeleg at det gjekk sånn. Båten har vore fleire gonger til Noreg og Europa før, men den dette vart nok ein tøff tur for dei, fortel Jan Steinsland, som var sentral i prosessen av uthentinga av materiale til båten.

Han fortel at det er ein liten og open båt, rundt 30 fot, utan motor og med berre segl og årar. Båten skulle eigentleg vera med i ein film.

–Det var nokon som ringte og ville ha materiale til ein Færøybåt som skulle vera med i filmen «Barbara», med Anneke von der Lippe i hovudrolla, fortel Steinsland, og legg til;

– Sånn vart det ikkje, for materialane var ikkje henta ut, og ikkje hadde dei tørka i tide heller. Men det var jo litt artig at dei ville ha den med der.

Arbeidet med uthenting av materiale starta i 1995 og vart så sendt over til Færøyane. «Naddoddur» sto ferdig bygd i 1997. Namnet fekk den frå Naddodd, som var ein mann frå Agder som var blant dei som busette seg på Færøyane på 800-talet.

– Eg var kontaktperson og organiserte dugnader og slikt. Knut Skaala hadde òg ein finger med i spelet, fortel Steinsland, og legg til;

– Materialene vart sendt med båten Norrøna, som gjekk mellom Bergen og Færøyane, og der bygde Jóhan Olsen båten.

«Naddodur» har seinare vore fleire gonger til Noreg. På eit landsstemne for kystlag i Trondheim fekk Kvinnherad kystlag mykje merksemd for å ha levert materiala.

Steinsland har hatt mykje kontakt med Færøyingane i åra etter. Ein sommar tok dei med seg fleire småbåtar over havet og låg fortøydd på Sunde heile sommaren.

Han fekk òg ein modell av båten, som no står i Bergslagen på Sunde.