Kan Kvinnherad hevda seg i konkurransen i år?

Prisen skal gå til ein kommune eller fylkeskommune som tar særleg godt vare på det nynorske skriftspråket, og dei som er nøgde med nynorskarbeidet i ein kommune eller fylkeskommune, kan føreslå sin kandidat til prisen.

Frå og med i år blir den gjæve prisen delt ut annakvart år, og som følgje av dette blir også premiepotten auka til 200.000 kroner.

Fristen for å nominera ein kommune eller fylkeskommune er 20. september.

I 2021 var Kvinnherad kommune nominert til prisen for andre år på rad, og låg i god posisjon på oppløpssida, som ein av fire finalistar. Til sist var det Ål som kunne smykka seg med tittelen.

Språklova i praksis

– I år ynskjer vi å premiere ein kommune eller fylkeskommune som har sett språklova ut i praksis. Det er viktig at dei tilsette i det offentlege kjenner til språklova og kva som er forventa av dei. Med den nye språklova får kommunane og fylkeskommunane rettar, og fylkeskommunane får nye plikter og såleis eit utvida språkansvar. For å oppfylle dette ansvaret må fylkeskommunane setje tydelege ambisjonar og mål for språkarbeidet og forankre dei i leiing og styringsdokument, seier seksjonssjef i Språkrådet Margrethe Kvarenes i ei pressemelding.

Kvarenes skal leia juryarbeidet på vegne av Kulturdepartementet. Juryen består av representantar frå Språkrådet, Nynorsk kultursentrum, Landssamanslutninga av nynorskkommunar, Noregs Mållag og KS.