– Kan ikkje trena i Rosendal lenger

A-laget har trena på kunstgrasbanane i både Rosendal og Uskedalen gjennom heile vinteren, no merkar dei at folk byrjar å få skadar.

Storslitasje

– For meg og dei som er involvert er det tydeleg at det er oppstått problem med kropp, bein og rygg etter å ha trena på banen i Rosendal. Me har også ungar som slit med anklar, kne og rygg på grunn av trening på for hardt underlag heile vinteren, fortalde Lund-Mikkelson.

– Det har gjort at dersom me skal ha eit lag når serien byrjar i midten av april, så må me slutta å trena i Rosendal. Fotballgruppa har forventa at det skulle bli ordna med ny kunstgrasbane i løpet av våren, men så kom kontrabeskjeden i vinter, og no er det heilt i det blå kva tid den nye banen kjem. Me kan i alle fall ikkje trena der meir, det kan eg ikkje utsetja karane for, la han til.

Per no har spelarane på A-laget treningspause fram til etter påske, og Lund-Mikkelson er ærleg på at han er usikker på om det blir seriestart på dei i det heile.

– Dei har fått stor slitasje på grunn av «betongen» dei spelar på. No håpar me på at graset blir opna for bruk rett uti april, slik at me får trena igjen, men akkurat no tek me ein pause slik at karane får lækja skadane sine. Så får me sjå korleis det går med serieoppstarten, konkluderte han.

Ikkje inkludert

Lund-Mikkelson fortel vidare at sjølv om Uskedalen er eit mogeleg alternativ, så har dei ikkje uavgrensa med tider der.

– Me har allereie treningstider i Uskedalen, men me må gå i dialog med dei om å få lov til å trena meir. Kunstgrasbana i Uskedalen er mykje betre enn i Rosendal. Han er nyare, noko som gjer han mindre brukt og mjukare, forklarte han.

– No treng Rosendal at ein får fortgang på å få ny bane, og eg meiner at gummigranulat er det einaste alternativet. Kommunen har halde på i tide og utide med å finna alternativ medan dei knaggar seg på at det er eit forbod på gang. Dette forbodet kjem om sju-åtte år, og det er ikkje eit bruksforbod. No må dei bestemma seg for å gå vidare, dei må laga barrierar, rister og alt mogeleg som gjer at granulata ikkje hamnar i sjøen, fortsette den engasjerte trenaren.

Lund-Mikkelson meiner elles at fotballgruppa og brukarane av banen ikkje har blitt nok inkludert i dialogen om den nye banen.

– Dette er noko som går ut over fysisk fostring i alderslaga, og det er synd at ein skal sitja på deira nivå og vera ein premissgjevar for at ting ikkje skjer. No treng me handling, understreka han avslutningsvis.