Kan gje økonomiske utfordringar

Dei mest sentrale endringane ei ny forskrift ville bringa med seg er;

* Reglar om bruk av gjødsel vil i større grad gjelda på tvers av gjødselslag i og utanfor jordbruket.

* Overgang frå minstekrav til spreieareal til grense for fosformengde.

* Endringar i spreiefrist.

* Innføring av krav til journal over faktisk disponering av gjødselvarene.

Forskrifta har utgangspunkt i vassdirektivet til EU, som seier at det kjem for mykje fosfor i vassdraga etter gjødsling.

Må ikkje sløsa

Fosfor er eit grunnstoff som er viktig for alt liv på Jorda. Menneskekroppen inneheld om lag 800 gram fosfor, og treng ein dagleg tilførsel på 600-700 milligram fosfor, ifølge Store norske leksikon. Fosfor vert brukt i framstillinga av mellom anna gjødsel, vaskemidlar og legemidlar.

Landbruksavdelinga og Miljøavdelinga hos Statsforvaltaren i Vestland skriv i eit fagnotat at vi må slutta å sløsa med fosfor.

«Fosfor er ein avgrensa ressurs og kan ikkje erstattast av andre stoff. Det einaste som kan motverke gradvis aukande knappleik på fosfor, er at vi unngår sløsing og resirkulerer fosfor som allereie er utvunne på ein langt meir effektiv måte», heiter det i notatet.

Statsforvaltaren har kome med fleire innspel etter høyringa. Dei meiner utkastet er positivt, men at landbruket i Vestland treng meir tid for tilpassing til nytt regelverk.

Innspela deira er mellom anna;

– Endringane krev utvida lagerkapasitet for husdyrgjødsel, truleg i stort omfang.

– Dei støttar hovudprinsippet om betre balanse mellom gjødsling og avling når det gjeld fosfor. Dei føreslegne fosforgrensene er eit godt kompromiss.

– Det er behov for ytterlegare innrettingar for å unngå at fosfor frå havbruksnæringa blir tilført landbruksjorda i Vestland, der det ikkje er behov for meir fosfor. Det er viktig å få på plass omsettingskrav for resirkulert fosfor så raskt som mogleg.

– Det er behov for ressursar og gode verktøy til kommunane, både for å godkjenna spreieareal og for å føra tilsyn med at husdyrgjødsel blir brukt på store nok areal. Det blir behov for auka tilsyn for å handheve eit innskjerpa regelverk.

– Dei meiner at kommunane framleis skal ha ansvar for dispensasjon for spreietidspunkt. Samstundes støttar dei endringa med at Statsforvaltaren får ansvar for å gje lokale forskrifter med innskjerpa krav, og ansvar for dispensasjonar frå dei generelle krava i forskrifta.

– Dei ber om meir tid for tilpassing til nytt regelverk. Dette gjeld forslaga om endra spreietidspunkt til før 1.september, at kommunen må godkjenna alt innmarksbeite for spreiing av både mineralgjødsel og husdyrgjødsel, og nye øvre grenser for spreiing av fosfor.

– Mange føretak må gjere store investeringar i lausdriftsfjøs. Utviding av gjødsellager vil kome i tillegg og kan gje store økonomiske utfordringar for landbruket i Vestland fylke der bruka er høvesvis små.