Kan ein få straumstøtte om ein flyttar til hytta?

Statsforvaltaren i Vestland har fått spørsmål frå Voss herad om korleis regelverket for å bruke hytter som heilårsbustader eigentleg er. Nokre hytteeigarar ynskjer å flytte til hytta for å få straumstøtte, ei problemstilling som har blitt aktuell grunna dei høge straumprisane.

Men straumstøtte blir berre gitt til heilårsbustader.

«Det rettslege spørsmålet er kva som skal til for å gjere ein fritidsbustad om til heilårsbustad.» skriv Statsforvaltaren i ei pressemelding, eit spørsmål dei sendte vidare til Kommunal- og distriktsdepartementet.

Fritidsbustad er for kortare opphald

I svarbrevet kan ein mellom anna lesa følgjande:

«Plan- og bygningslova har ikkje noko legaldefinisjon av fritidsbustad. Bygningslovkomitéen definerte sportshytter og sommarhus som bygninger som bare er beregnet på beboelse en kortere tid av året i forbindelse med ferier og fridager (...). Fordi fritidsbustader etter lova er meint for meir sporadisk opphald, er dei underlagt mindre strengje bygningstekniske reglar samanlikna med heilårsbustader.»

Statsforvaltaren meiner med bakgrunn i svaret at det er avklart at ein må søkje om bruksendring for å kunne bruke fritidsbustad som heilårsbustad.

«Dersom hytta ligg i eit område som er sett av til fritidsbusetnad, vil det ikkje vere lovleg å nytte hytta som heilårsbustad. Det er mogleg å søkje dispensasjon frå planen, men ingen har krav på dispensasjon», skriv dei.