Kan det vera ein ørsters?

Anita Vindenes Oppedal har sendt inn bilete av eit uidentifisert objekt, det som kanskje kan vera ein østers, som vart funnen i strandkanten i Åkra.

Det er første gong innsendaren har sett noko slikt.

– Eg lurer på om det er eit vanleg syn i fjordane våre i kommunen, undrar ho, og stiller vidare spørsmål ved om det kan vera ein stillehavsøsters.

Den vart funnen under bading i Åkra.

Uønskt

Attende i 2019 vart det observert stillehavsøsters i Kvinnherad. Då oppmoda seniorforskar ved Havforskingsinstituttet, Stein Mortensen til ryddedugnad for å få arten fjerna.

– Det finst organiserte ryddekampanjar på sør- og austlandet, men det er ikkje nok med desse kampanjane åleine. Folk må ta dugnadsgrep og gjera ein innsats sjølve. Dette er ein invaderande framandart som øydelegg miljøet vårt, så den er sjølvsagt ikkje ønska, sa han til Grenda då.

Stillehavsøstersen veks på hardt underlag som fjell, stein og skjell, vanlegvis frå normal vasstand og ned til om lag 1,5 meters djup, og nokre gongar ned til 3-4 meter. Normal storleik er mellom 8-20 cm, men dei kan også bli opptil 40 cm.