– Kan bli ein styrke for reiselivet i Kvinnherad

Kvinnherad er allereie med i styret i det tilsvarande selskapet Visit Sunnhordland, og med ein fersk styreleiar i Visit Hardangerfjord står kommunen no med ein fot komfortabelt og godt planta i kvar leir på styrenivå.

Dette trur Lund-Mikkelson kan vera med på å styrka Kvinnherad som turistdestinasjon.

– Turistane bryr seg jo ikkje om kommunegrenser, og vil truleg berre setja pris på at me kan tilby eit tettare samarbeid mellom opplevingane som finst på kysten og lenger inn i fjordane og fjella. Kvinnherad ligg jo midt i mellom, og me kan såleis utnytta desse kontrastane. Det me alle vinn på er jo å få behalda turistane i området over lengre tid, seier ho.

Viktig verv for viktig bransje

Sidan 2019 har Lund-Mikkelson vore tilsett som rådgjevar for reiseliv i Kvinnherad kommune, og ho held dermed fram i same lei med det nye vervet.

– Eg såg på det som ei ære å bli spurt, for det er eit viktig verv for ein viktig bransje her i regionen. Nokre moglegheiter må ein jo berre hive seg på, men samstundes er det litt småskummelt, medgir ho og held fram:

– Eg trur det vil bli komplementerande i forhold til jobben eg har; at eg kan bringa med meg noko frå jobben som reiselivsrådgjevar inn i Visit Hardangerfjord, og at det eg lærer i det nye vervet vil kunna nyttast i jobben eg har i kommunen.

Bra team

Margit overtek leiarrolla etter Hilde Charlotte Solheim, og meiner ho kan ha blitt innstilt til vervet fordi Visit Hardangerfjord har hatt eit ynskje om å involvera Kvinnherad meir i det som skjer innan reiselivet i Hardangerregionen.

– Styret er sett saman av ulike folk frå ulike kommunar og med ulike bakgrunnar. Eg kjenner dei fleste frå før og veit at det er eit veldig bra team. Eg ser fram til å få litt nye impulsar og kjenne på ei utvikling innan det eg jobbar med, sluttar ho.

Det nye styret i destinasjonsselskapet, som har som oppgåve å styrka reiselivsnæringa i Hardanger, ser no slik ut:

Styreleiar: Margit Lund-Mikkelson

Nestleiar: Jostein Soldal

Styremedlemmar: Åsmund Bakke, Tina Våtvik Olsen, Ok-Hini Rønning, Anna Gursli Langesæter og Roald Aga Haug

Varamedlem: Anders Vatle