Justisministeren besøkte Kvinnherad politistasjon: – Eit godt møte med flinke politifolk

Måndag morgon tok politistasjonssjef Sigurd Børve og resten av dei tilsette ved Kvinnherad politistasjon i mot justisminister Emilie Enger Mehl. Det var fyrste stopp på Mehl si vetle rundreise i Vest politidistrikt denne måndagen.

– Eg synest det er viktig å reisa ut og få høyra frå dei som jobbar heilt lokalt og verkeleg veit kor skoen trykker, seier Emilie Enger Mehl til Grenda.

Bemanning i fokus

Eit sentralt tema på måndagens møte var ressursar og bemanning ved Kvinnherad politistasjon.

– Eg har eit klart inntrykk av at dei gjer ein veldig god jobb utifrå dei ressursane dei har tilgjengeleg. Så har dei utfordringar med varierande rammer i forhold til talet på folk dei har tilgang til. Eg har eit klart inntrykk av at dei kunne fått til endå meir om dei hadde fleire folk å ta av, seier Mehl og held fram:

– Det er eit viktig innspel for meg. Den nye regjeringa har eit klart mål om å styrka nærværet og beredskapen i heile landet. Og det gjeld også i Kvinnherad. Det er viktig å høyra kva løysingar vi kan finna fram til for å styrka det lokale politiet.

Sigurd Børve var glad for at justisministeren tok seg tid til å besøkja Kvinnherad.

– Det er veldig positivt at dei som sit i det leddet tek runden og bryr seg om å høyra korleis det daglege livet er her ute i distriktet. Vi gjekk inn på kva forventingar som er til dei faglege utfordringane våre, då særskild på ressurs og bemanning. Justisministeren var lydhøyr, og eg opplever at det var eit veldig positivt møte, seier Børve.

Rommet mellom justis og helse

Noko justisministeren er einig i.

– Det var eit godt møte med flinke politifolk. Det var både veldig kjekt og nyttig å få innspel frå den lokale politistasjonen. Dei gjer ein viktig jobb for folk i Kvinnherad, og har eit stort ansvarsområde i ein kommune med mange geografiske utfordringar, seier Mehl.

Dei geografiske utfordringane er noko som speglar seg att i fleire distriktskommunar i landet. Og er ein av fleire grunnar til at justisministeren la besøket sitt til Kvinnherad.

– Kvinnherad er ein kommune som har mykje til felles med mange andre distriktskommunar, med store avstandar og mange forskjellege oppgåver dei skal yta, seier Mehl.

Og peikar blant anna på at politiet i Kvinnherad har mange oppgåver knytt til psykiatrien. Eit felt som Enger Mehl har stort fokus på om dagen.

– Eg vart statsråd midt i ei stor krise på Kongsberg. Dette med korleis vi betre skal fanga opp rommet mellom helse og justis, for å følgja opp alvorleg psykisk sjuke på ein beste mogleg måte, har alltid vore viktig. Men vart veldig tydeleg for meg med eingong eg byrja som statsråd. Difor var det eit arbeid eg starta med eingong saman med helseministeren. Det var difor godt å få innspel på akkurat dette frå Kvinnherad politistasjon, seier Mehl.

Etter møtet i Kvinnherad, reiste justisministeren vidare til Odda og Haugesund. Med seg tilbake til hovudstaden har ho ei rekkje innspel ho vil jobba vidare med.

– Det var eit nyttig møte for meg. Eg har fått mange viktige innspel som eg tar med meg vidare på den jobben eg skal gjera nasjonalt, sluttar Mehl.

Kjenner kommunen godt

Ordførar Hilde Enstad tok også del i morgonmøtet på Kvinnherad politistasjon måndag. Ho er glad for at justisministeren prioriterte å ta turen til Kvinnherad.

– Det var eit hyggeleg møte kor politiet fekk møta ein engasjert justisminister som var oppriktig interessert i det dei hadde å koma med. Ho lytta og noterte flittig i møtet, så eg tenkjer at ho har fått med seg ein del ting som ho vil jobba vidare med, seier Enstad.

Ordføraren trur eit slikt møte skapar tryggleik for dei tilsette ved Kvinnherad politistasjon.

– Vi har ein justisminister som kjenner kommunen vår godt, og ei regjering som er oppteken av både by og bygd. Dei ynskjer å ivareta heile folket. Så eg er veldig glad for at Emilie Enger Mehl tok turen til Kvinnherad for å høyra på dei utfordringane som politiet har her. Eg trur det var veldig fint for dei tilsette å få besøk av ho. Sjølv om det ikkje vart så mykje samtale på alle, så er det ein tryggleik at justisministeren faktisk tek turen på besøk for å høyra på dei, seier Enstad.