Julestemning i kvar detalj
Frå og med i kveld kan ein oppsøke kortreist nissekraft av det særs sjarmerande slaget i Rosendal. Toppetasjen i Varehuset Rosendal er nemleg omgjort til eit nissefint galleri!
Publisert
Sist oppdatert
Kvart år inviterer Jul i Rosendal born og unge til å vera med på å lage til utstilling i Rosendal. Samarbeidet skjer via skular og barnehagar i området, og arrangøren set stor pris på at både små og store tek utfordringa på strak arm.
– 247 skuleborn og ungdommar og 120 born frå barnehagane er med i år, informerer Jul i Rosendal i ei pressemelding.
Annonse
Dei unge kunstnarane kjem frå Mauranger skule, Rosendal FUS Barnehage, Malmanger skule, Redesigngruppa på Rosendal Ungdomsskule, samt frå Omvikdalen barnehage og skule.
Nissefint
I år er det nisse-tema for utstillinga. Basert på alle dei flotte kunstverka som er utstilt, har det ikkje mangla på korkje kreativitet eller skaparglede. Det er mange ulike formingsteknikkar og ulikt materiell i bruk, og både redesign, soloarbeid og gruppearbeid er representert.
– Her er det mange fine nissefjes og auger og søte nisseføter. Vi oppfordrar dykk alle til å sjå etter, og nyte detajane. Om du lyttar er det flott å høyre dei små fortelje om prosessen når dei har laga kunsten, lokkar Jul i Rosendal-nemnda i pressemeldinga.
Annonse
– Publikum i bygdene får noko fint dei kan oppleve i vekene fram mot jul. Vi får kunst til utstilling, og borna tar med sin kohort og viser stolt fram kva dei har laga, skriv arrangørnemnda, som set stor pris på samarbeidet med skular og barnehagar.
Jul i Rosendal blir i år gjennomført utan marknad, ei avgjerd arrangøren er svært nøgd med. Marknaden skulle nemleg vore arrangert førstkomande laurdag.
– Vi har lotteri og kunstutstilling i år og tenkjer det må ordne seg med marknad i 2022.
Utstillinga står til søndag 19. desember.
