Julegåveaksjon 2021: - Givargleda er stor

Julegåveaksjonen er i gang, og i følgje Veronica T. Thorsen i Kvinnherad frivilligsentral er det allereie kome inn mange bidrag.

– I fjor fekk me inn vel 500 gåver, og i år ser me dei same tendensane. Det er stadig fleire som vil gi, og det er like overveldande kvart år. Ein merkar at mange set pris på å få hjelpa personar i nærmiljøet sitt, fortel Thorsen nøgd.

Frivilligsentralen inviterer også i år alle som ønskjer til å gje ei julegåve til nokon som treng det. Dette kan vera mottakarar som har lite pengar, eller dei som er einsame og ikkje får så mange gåver.

Onsdag morgon var Thorsen og Anja Thunold i full sving med å klargjera julegåver som fylte eit langbord på Kulturhuset Husnes.

– Det skal ikkje stå på givargleda til kvinnheringane, for me har allereie begynt å få inn mange gåver. Det er mange som ønskjer ei gåve frå aksjonen, så behovet er stort også i år, fortel ho og legg til:

– Me vil helst ha opne gåver, slik at me kan tilpassa gåvene til mottakaren, og passa på at det mellom anna ikkje blir store forskjellar i ein familie.

Anonymt

Aksjonen vert gjennomført i samarbeid med ulike tenester som NAV, Rus og psykiatri, eining for barn og familie, eining for integrering og opplæring, sjukeheimar og Flyktningtenesta. Dei som treng å få gåve frå aksjonen plar å bli meldt inn via slike tenester, men ein kan også ta direkte kontakt med frivilligsentralen.

– Dei kommunale tenestene sender oss anonyme lister med kjønn og alder, og dei frivillige som melder seg får ein person å kjøpe til. Dersom du ikkje har kontakt med desse tenestene, men ynskjer ei gåve, kan du kontakte frivilligsentralen. Alle handvendingar vert behandla anonymt.

I fjor fekk frivilligsentralen vel 100.000 kroner i gåve frå Sparebank 1-stiftinga Kvinnherad, som vart nytta til å kjøpa inn julemat til dei som trong det.

– I år ringde stiftinga igjen, og fortalte at det kjem ei gåve i år også, og det er heilt fantastisk, smiler Thorsen.

Givarar kan i år som i fjor overføra eller vippsa eit valfritt beløp til frivilligsentralen. Då vil dei saman med ungdommar frå ungdomsskulen og KVV gå på handel.

– Me byrja med dette i fjor, og fekk god hjelp frå skuleelevar frå innsats for andre og helsefag. Mange nytta seg av tilbodet, og me vil difor tilby det same i år, smiler ho.

Det er sårt

Thorsen fortel at arbeidet med julegåveaksjonen, mellom anna sortering og klargjering av den store gåvehaugen, vekkjer blanda kjensler.

– Eit slikt arbeid er det beste, men også det verste. Det får deg verkeleg til å reflektera og tenkja. Det er sårt å sjå kor stort behovet er, og at det aukar for kvart år. Ein tenkjer kanskje ikkje over det i kvardagen at det bur folk rundt oss som ikkje har det så bra, og som ikkje kan handla inn julegåver til dei rundt seg. Det er vondt, men samstundes er det godt og gjevande å kunne hjelpe, sluttar Thorsen.