Jula regna vekk

Det har vore nokre våte desembermånader dei siste åra. Også 2017-utgåva vart av det særdeles fuktige slaget.

Tabellen avslører at slusene verkeleg opna seg i desember. Ikkje uventa måtte Matre ta den verste støyten. Men 733 millimeter, med andre ord trekvart meter med vatn, er formidabelt, sjølv i bygda som stadig plasserer seg heilt i Norgestoppen når det gjeld nedbør. Både Austrepollen og Omvikdalen fekk solide dosar med regn, med høvesvis 561,4 og akkurat 500 mm. Ølve kom rett under 500-grensa med sine 494,5 mm.

– 2015 var faktisk bittelitt verre. Då kom det 18 millimeter meir, kommenterer Henrik Barthel.

Men det er no helst ei fattig trøyst.

 

Badeplass

Jamt over var dei to siste dagane før julaftan dei våtaste i desember. Folk hugsar nok at både kjellarar og grusvegar rundt om i kommunen vart skadde, og på Hatlestrand – der det kom 115,5 millimeter på 24 timar - vart fylkesvegen til og med nytta som badeplass. SKL på Opstveit noterte for sikkerheits skuld 99,4 millimeter om morgonen vetle-julaftan og nye 110,4 mm dagen etter.

Minst nedbør falt det i Uskedalen, der Kurt Haugland på Korsneset samla 290,9 millimeter. Også Vang i Rosendal heldt seg under 300-merket. Men det var folket på Varaldsøy som kunne gle seg over flest dagar utan regn, 12 i talet.

På Husnes registrerte Hydro 392,8 millimeter i desember. Men rekorden deira er frå 2004, då det kom 453,9 mm i skåla til aluminiumsprodusenten. Tørrast var det i desember 1978 med 19,7 mm. Desembernormalen på Husnes, det vil seia snittet av dei siste 30 åra, er 261,4 mm.

 

Svinga veldig

Temperaturane svinga veldig førre månad. Frå pluss 12,5 i Rosendal 7. desember til minus 6,0 i Omvikdalen ti dagar seinare. Snittet la seg kring 3,5 grader, noko som er ein del lågare enn i 2016. Då koste Rosendal seg med 5,9 grader.