Jul i Toragarden vart ein suksess: - Me ynsker å gi noko tilbake

Frå start til slutt var tunet til Sandra og Georg Røssland fylt med folk og julestemning laurdag. Arrangørane var både overvelda og glade for at så mange trossa regnvêret og ville vera med på deira første utgåve av Jul i Toragarden.

– Me har tenkt på dette i over to år, men grunna pandemien har me måtta venta heilt til no. Me har vore veldig spente, spesielt med tanke på vêret, men det ser ut til at folk ikkje bryr seg om det, og heller kler seg godt. Det har vore eit bra trykk med folk heilt sidan me opna i dag, og det verkar som at folk kosar seg. Me håpar dette kan bli ein tradisjon, smilte Sandra Røssland.

Sjå biletserie frå då Sandra og Georg Røssland opna tunet sitt og inviterte til «Jul i Toragarden»

Viktig bodskap bak

Arrangørane kunne fortelja at målet med denne dagen er å spreia juleglede, men også for å hjelpa andre og gje litt tilbake. Dei tre ungane til Sandra og Georg er nemleg alle prematurfødde, difor ynskjer dei å overføra pengane frå lodd og kiosksalet til nyføddintensiven - øyremerkt til trivselstiltak for tilsette og bebuarar no før jul.

– Det har vore nokre hektiske veker for å få på plass alt, men resultatet blei heilt topp. Me er over snittet glad i å vera sosiale, og likar å bidra og hjelpa andre. Me ynskjer difor å gje noko tilbake til både dei tilsette og folk som er i same situasjon. Me reiser til Haugesund for å overrekka pengane i veka som kjem, fortel Sandra.

– Det har eg aldri prøvd før, så det får eg heilt sikkert til

Utstillarane stod spreidd rundt på det koselege tunet deira, og arrangementet vart blest i gang av Husnes skulekorps. I teltet på tunet var det sal av kaffi, kaker, bollar og graut.

Blant utstillarane stod både bedrifter og privatpersonar. Renate Thorsen Røyrvik hadde laga mykje flott pynt, både i betong og makramé. Også det hadde kravd litt førebuing.

– Makramé byrja eg med i september, så alt på dette langbordet har eg laga på fire månadar. Eg må innrømma at det har vore litt hektisk, men veldig gøy, fortel Renate.

– Kva som gjorde at du byrja med makramé/knyting?

– Det starta med at eg måtte køyra mor mi til legevakta, og sidan det alltid er evig lang ventetid der, bestemte eg meg for å prøva å laga ein ampel, noko eg fekk til. Etter det har det berre balla på seg. Eg har vokse opp med Pippi, så eg tenkjer ofte; det har eg aldri prøvd før, så det får eg heilt sikkert til, smilte den dyktige dama.

Utover dagen kom også nissen og Kvinnherad brann og redning, til stor glede for dei minste.