Jubel for gang- og sykkelveg

Det er Vestland fylkeskommune som har vore byggherre, og det var også dei som hadde regien på opningsarrangementet måndag ettermiddag. Gunhild Vangsnes, seksjonsleiar planlegging og utbygging, var konferansier, medan Dina Lefdal, avdelingsdirektør for infrastruktur og veg, var fyrste talar.

– Vi skal opna ein etterlengta gang- og sykkelveg. Veldig kjekt å få dette på plass, sa ho.

Løyst på god måte

Den 1,2 kilometer lange strekninga byr på fortau, betre busshaldeplassar, gateljos, tre bruer og lokal stein. Det har også blitt tryggare å kryssa fylkesvegen. Ikkje minst er det utført flaumsikring.

– Vi har kjent litt på naturkreftene med mykje vatn og flaum. Heretter skal ein kunna ta unna vassmassane, sa Lefdal.

Ho takka også Dimmelsvik Entreprenør for godt samarbeid og vel utført arbeid.

– Utfordringane med grunntilhøva er løyste på ein god måte, meinte Lefdal.

Ordførar Hilde Enstad tykte det var ein fantastisk dag. Ho opplyste at i 2018 vart prioriteringane i Kvinnheradpakken vedteke, med gang- og sykkelveg gjennom Herøysundet på 3. plass.

– Denne dagen har vi venta på. Mange har jobba for dette, sa ho, og bad dei frammøtte senda varme tankar spesielt til dei tidlegare ordførarane Bjarne Berge og Synnøve Solbakken.

Neste etappe

Øystein Skjæveland bar fram ei helsing frå bygda, i form av eit dikt. Eine verset lydde:

«Så vegen vart slett ikkje billeg.

Det kostar med mann og maskin.

Men same koss prislappen ser ut:

Vegen vart steikjande fin».

– Vi ventar på neste etappe, understreka Skjæveland til slutt.

Elevane i 1. til 7. klasse ved Bringedalsbygda skule kasta glans over seansen med vakker song. «Inst i ditt hjarte er du alltid vestlending», slo dei fast. Så fekk ordførar Enstad fekk æra av å klippa snora, godt hjelpt av ein gjeng svært entusiastiske skuleelevar. Etterpå ville ungane knokehelsa på ordføraren, og nokon greidde til og med snika seg til ein klem.

Kake, skulebollar, saft og kaffi avslutta den trivelege stunda.